𝐏𝐀𝐌 𝐃Í𝐋𝐈 𝐇𝐎 𝐌𝐈𝐍𝐈𝐒𝐓𝐑𝐔 𝐌𝐂𝐈 𝐇𝐀𝐋𝐎 𝐄𝐍𝐊𝐎𝐍𝐓𝐑𝐔 𝐁𝐀 𝐏𝐋𝐀𝐍𝐔 𝐌𝐀𝐍𝐔𝐓𝐄𝐍𝐒𝐀𝐔𝐍 𝐌𝐄𝐑𝐊𝐀𝐃𝐔 𝐍𝐎 𝐊𝐎𝐍𝐒𝐓𝐑𝐔𝐒𝐀𝐔𝐍 𝐌𝐄𝐑𝐊𝐀𝐃𝐔 𝐌𝐀𝐍𝐋𝐄𝐔𝐀𝐍𝐀 𝐍𝐎 𝐓𝐀𝐈𝐁𝐄𝐒𝐈.

Dili, 11 Dezembru 2025

Prezidente Autoridade Munisípiu (PAM) Dili, Francisco dos Santos ho Ministru Komérsiu no Indústria (MCI), Sr. Nino Pereira ohin dader [kinta-feira 11/12/2025] halo enkontru importante hodi ko’alia asuntu urjente kona-ba dezenvolvimentu merkadu prinsipais iha sidade Díli liu-liu merkadu Taibesi no Manleuna.

Objetivu husi sorumutu ne’e, atu diskute planu manutensaun ba Merkadu Manleuana no Taibesi ne’ebé eziste ona no mós planu futuru ba konstrusaun foun iha fatin refere.

Iha diskusaun ne’e, parte rua konkorda katak melloramentu ba infraestrutura merkadu esensiál tebes hodi fasilita atividade ekonómika lokál. PAM Dili ho Ministru MCI esforsu atu fornese kondisaun ne’ebé di’ak liu no higiéniku ba komunidade no negosiante sira.

Iha enkontru ne’e PAM hatete “tinan oin sei halo manutensaun ba merkadu rua, no mós kona-ba planu konstrusaun merkadu foun, no governu liu husi AMD no MCI presija prepara fatin provizoriu hodi tau vendedor sira, atu nune’e konstrusaun merkadu bele la’o ho diak. Alende ne’e, sei kria ekipa ida hodi foti dadus vendedor sira ne’ebé faan sasan iha merkadu atu nune’e wainhira konstrusaun remata fó prioridade ba vendedor sira ne’ebé antes ne’e utiliza ona fatin iha merkadu.”

Planu konstrusaun refere agora daun-daun sei iha faze estudu viabilidade, no Pasu ne’e importante tebes atu asegura katak projetu sira ne’e sustentável no benefisia duni populasaun antes implementasaun fíziku hahú.

Enkuantu Koordenasaun entre MCI no PAM Dili sei kontinua intensivu durante faze estudu ne’e.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)