GOVERNU NO ESTADU RDTL ORGANIZA “MARXA POPULÁR” HODI SELEBRA LORON EROI NASIONÁL BA DALA VIII NO MEMORIALIZA TINAN 47 MATE SAUDÓZU KOMANDANTE NICOLAU LOBATO IHA BINANI–TURISKAI

Díli, 31 Desembru 2025

Goveru Repúblika Demokrátika Timor-Leste, hamutuk ho instituisaun estadu sira, ohin loron 31 Desembru 2025, organiza atividade “Marxa Populár” hodi selebra Loron Eroi Nasionál ba Dala VIII, no memorializa tinan 47 mate Saudózu Komandante Boot FALINTIL Nicolau dos Reis Lobato, ne’ebé monu iha campo batalha iha Binani, Suku Mindelo, Postu Administrativu Turiskai, Munisípiu Manufahi, iha loron 31 Desembru 1978.

Atividade “Marxa Populár” hahú hosi Palásiu Prezidensiál, Ai-Tarak Laran, to’o iha Rotunda Comoro, iha estatua Saudózu Prezidente Nicolau Lobato nian. Eventu ida ne’e partisipa hosi Prezidente Autoridade Munisipiu Dili, Sr, Francisco dos Santos, Sua Exelénsia Ministru ba Asuntu Kombatentes Libertasaun Nasionál (MAKLN), Gil da Costa Monteiro “Oan Soru” hamutuk ho funsionáriu sira AMD no instituisaun estadu no komunidade jerál.

Marxa Populár ne’e la’ós de’it atu hanoin hikas Saudózu Nicolau Lobato, maibé mos atu onra no rekoñese erói nasional hotu-hotu ne’ebé monu iha funu libertasaun hahú hosi tinan 1975 to’o 1999, tanba defende Ukun-Rasik-Ana, dignidade no liberdade Povu Timor leste.

Atividade ida ne’e partisipa mos hosi Prezidente Tribunál Rekursu, Membru Parlamentu Nasionál, Membru Governu IX Konstitusionál, Prokuradór Jerál Repúblika, Tenente Jenerál, Lere Anan Timor, Xefe Estadu Maiór F-FDTL, lideransa nasional, veteranu no kombatentes, korpus diplomátiku, autoridade sívil, militár no PNTL, estudante, no populasaun iha Munisípiu Dili.

Selebrasaun Loron Nasional Herois ba Dala VIII remata ho deposisaun koroa ai-funan iha Rotunda Nicolau Lobatu, hanesan sinal onra, respeitu no gratidãu boot ba heróis nasional sira ne’ebé fó sira-nia moris ba independénsia, soberania no ukun-rasik-anas Repúblika Demokrátika Timor Leste.

Fontes : (Media Gab. PAM)