𝐃í𝐥𝐢 𝟎𝟔 𝐉𝐚𝐧𝐞𝐢𝐫𝐨 𝟐𝟎𝟐𝟔.

Prezidente Autoridade Munisípiu (PAM) Dili, Sr. Francisco dos Santos halo abertura ba aprezentasaun orsamentu aprovadu tinan 2026 iha salaun B AMD.

Atividade ne’e iha objetivu atu partilla informasaun importante sira kona ba implementasaun orsamentu tinan 2026.

Iha nia intervensaun, PAM Dili hateten katak orsamentu tinan 2026 ne’e bazeia ba prioridade sira ne’ebé defini ona iha planu anual no planu estratéjiku munisípal, tanba ne’e despeza sira tenke responde ba nesesidade real komunidade no suporta servisu públiku ne’ebé efisiente no transparente.

PAM Dili mos rekomenda ba servisu munisípal sira hotu atu utiliza orsamentu ne’ebé aloka ona tuir planu no programa ne’ebé aprova ona, no husu ba diresaun ida-idak atu submete ona proposal hodi hetan aprovasaun husi PAM hodi nune’e programa sira bele implementa tuir tempu ne’ebe planu ona.

Apresentasaun Orsamentu Jeral Estadu ba Munisipiu Dili ne’e, organiza husi servisu munisipal Ajensia Planeamentu AMD nian.

Iha nia esplikasaun, Diretora Ajensia Planeamentu Munisipal Dili informa kona-ba orsamentu kada kategoria, alokasaun orsamentu pur programa 2026, alokasaun orsamentu pur kategoria 2026, no ikus, husu ba servisu munisipál sira hotu atu halo ona proposta ba PAM Dili hodi hetan aprovasaun, atu nu’e Servisu Munisipal relevante sira bele hahu prosesu ona.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)