PAM Díli hala’o enkontru ho Programa 𝗣𝗔𝗥𝗧𝗜𝗦𝗜𝗣𝗔 – 𝗣𝗮𝗿𝗰𝗲𝗿𝗶𝗮 𝗵𝗼𝗱𝗶 𝗛𝗮𝗺𝗲𝘁𝗶𝗻 𝗗𝗲𝘇𝗲𝗻𝘃𝗼𝗹𝘃𝗶𝗺𝗲𝗻𝘁𝘂 𝗦𝘂𝗸𝘂 𝗻𝗼 𝗔𝗱𝗺𝗶𝗻𝗶𝘀𝘁𝗿𝗮𝘀𝗮𝘂𝗻 𝗠𝘂𝗻𝗶𝘀𝗶𝗽á𝗹, ne’ebé lideradu husi Team Leader PARTISIPA, Sra. 𝐄𝐦𝐞𝐫 𝐏𝐮𝐫𝐝𝐨𝐧, hodi halo aprezentasaun ekipa no diskute prioridade dezenvolvimentu munisipál.

𝐃í𝐥𝐢, 𝟏𝟒 𝐉𝐚𝐧𝐞𝐢𝐫𝐮 𝟐𝟎𝟐𝟔

Prezidente Autoridade Munisipál Díli, Sr. 𝗙𝗿𝗮𝗻𝗰𝗶𝘀𝗰𝗼 𝗱𝗼𝘀 𝗦𝗮𝗻𝘁𝗼𝘀 hala’o enkontru ho Programa 𝗣𝗔𝗥𝗧𝗜𝗦𝗜𝗣𝗔 – 𝗣𝗮𝗿𝗰𝗲𝗿𝗶𝗮 𝗵𝗼𝗱𝗶 𝗛𝗮𝗺𝗲𝘁𝗶𝗻 𝗗𝗲𝘇𝗲𝗻𝘃𝗼𝗹𝘃𝗶𝗺𝗲𝗻𝘁𝘂 𝗦𝘂𝗸𝘂 𝗻𝗼 𝗔𝗱𝗺𝗶𝗻𝗶𝘀𝘁𝗿𝗮𝘀𝗮𝘂𝗻 𝗠𝘂𝗻𝗶𝘀𝗶𝗽á𝗹, ne’ebé lideradu husi Team Leader PARTISIPA, Sra. 𝐄𝐦𝐞𝐫 𝐏𝐮𝐫𝐝𝐨𝐧, hodi halo aprezentasaun ekipa no diskute prioridade dezenvolvimentu munisipál.

Objetivu husi enkontru ne’e atu introdús ekipa apoiu Programa PARTISIPA, inklui Asesora Governasaun Lokál (Local Governance Advisor – LGA) ne’ebé dezignadu ba Autoridade Munisipál Díli, no mos ekipa PNDS, ne’ebé sei fornese asisténsia téknika direta ba administrasaun munisipál Dili, tuir termu referénsia ne’ebé aprova husi Ministériu Administrasaun Estadu (MAE).

Tuir Team Leader PARTISIPA, Sra. Emer Purdon katak, Antes ne’e PARTISIPA servisu hamutuk ho Ministériu Administrasaun Estatál (MAE) hala’o ona rekrutamentu ba Asesora Governasaun Lokál (Local Governance Advisor – LGA) dezignada ba Autoridade Munisipál (AM) Dili hodi fornese asisténsia téknika direta ba Autoridade tuir termu referensia ne’ebé aprovadu husi Sua Exelénsia Ministru MAE ba asesora Governasaun Lokal ne’e.

Iha okaziaun ne’e, Prezidente Autoridade Munisipál Díli agradese ba servisu kooperasaun entre Governu Austrália no Governu Timor-Leste, liu-liu ba Embaixada Austrália iha Timor-Leste no ajénsia sira ne’ebé partisipa iha Programa PARTISIPA, ne’ebé fó atensaun ba dezenvolvimentu rekursu umanu Timor-Leste nian, espesialmente iha Autoridade Munisipál Díli.

PAM Díli hateten katak IX Governu Konstitusional iha ambisaun boot atu implementa desentralizasaun podér lokál ba nível báziku. Tanba ne’e, Autoridade Munisipál Díli presiza ekipa ne’ebé forti no kualifikadu hodi estabelese sistema governasaun lokál ne’ebé di’ak, atu prepara ba implementasaun poder lokal tuir Planu Governu nian iha tinan 2027.

Prezidente AMD mós apresia prezensa no kontribuisaun ekipa PARTISIPA ne’ebé ohin loron halo apresentasaun, ne’ebé sei servisu hamutuk ho Autoridade Munisipál Díli hodi hametin planeamentu, aspétu legal no setór estratéjiku sira seluk, hodi garante bem-estar komunidade no dezenvolvimentu munisipál iha Díli.

Alende ne’e Programa PARTISIPA reafirma nia kompromisu atu apoia Governu Timor-Leste, liu-liu Autoridade Munisipál Díli, iha fortalese governansaun lokál, planeamentu dezenvolvimentu, jestaun finanseira, inkluzaun sosiál, no implementasaun programa dezenvolvimentu suku, hanesan PNDS.

Programa PARTISIPA hetan finansiamentu husi Governu Austrália no implementadu husi DT Global, no kontinua servisu hamutuk ho Governu Timor-Leste hodi suporta dezenvolvimentu sustentável iha nível munisipál no suku.

Fontes : (𝗠é𝗱𝗶𝗮 𝗚𝗮𝗯. 𝗣𝗔𝗠)