𝐏𝐑𝐄𝐙𝐈𝐃𝐄𝐍𝐓𝐄 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒𝐈𝐏Á𝐋 𝐃Í𝐋𝐈 𝐏𝐀𝐑𝐓𝐈𝐒𝐈𝐏𝐀 𝐄𝐍𝐊𝐎𝐍𝐓𝐑𝐔 𝐊𝐎𝐍𝐀-𝐁𝐀 𝐏𝐑𝐄𝐏𝐀𝐑𝐀𝐒𝐀𝐔𝐍 𝐕𝐈𝐙𝐈𝐓𝐀 𝐏𝐑𝐈𝐌𝐄𝐈𝐑𝐔-𝐌𝐈𝐍𝐈𝐒𝐓𝐑𝐔 𝐁𝐀 𝐈𝐇𝐀 𝐌𝐔𝐍𝐈𝐒𝐈𝐏𝐀𝐋 𝐍𝐎 𝐇𝐀𝐌𝐄𝐓𝐈𝐍 𝐏𝐎𝐑𝐓Á𝐋 𝐌𝐔𝐍𝐈𝐒𝐈𝐏Á𝐋

𝐃í𝐥𝐢, 𝟏𝟐 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Prezidente Autoridade Munisipál Dili, Sr. Francisco dos Santos, akompaña husi ekipa GAT-PAM no tékniku IT sira ne’ebé responsavel ba Portál Munisipál Dili, partisipa iha enkontru koordenasaun ne’ebé prezide husi Eselénsia Ministru Administrasaun Estatal (MAE), Tomás do Rosário Cabral iha Salaun VIP MAE.

Enkontru ne’e foka liu ba preparasaun ba vizita S.E. Primeiru-Ministru ba munisípiu sira.

Ministru Administrasaun Estatál S.E. Tomás do Rosário Cabral subliña, vizita ne’e ho objetivu atu rona diretamente husi kada Munisípiu hodi foka liu progressu Kondisaun Mínima ne’ebé sei aprezenta diretamente husi kada Prezidente Autoridade Munisípiu. No mós atu hare prestasaun servisu, no garante aliñamentu ho prioridade dezenvolvimentu nasionál.

Alende ne’e Ministru mós aprezenta kona-ba matéria téknika ba aprezentasaun ne’ebé sei hato’o durante Primeiru-Ministru nia vizita, inklui dezempeñu munisípiu, ezekusaun orsamentu, programa prioridade sira, dezafiu xave sira, no planu estratéjiku sira atu hadi’a servisu públiku sira.

Ministru mós sita kona-bá Importánsia husi Portál Munisipál ne’ebé mós hanesan instrumentu xave ida atu promove transparénsia, responsabilizasaun, no governasaun dijitál. Iha ambitu ne’e ekipa Dili fahe atualizasaun kona-ba dezenvolvimentu Portál Munisipál, ne’ebé sei hasa’e asesu públiku ba informasaun no hametin komunikasaun entre munisípiu no sidadaun sira.

Alende ne’e, enkontru aborda kona-ba distribuisaun rezultadu AKM (Avaliação de Kapasidade Munisipál), ne’ebé sei orienta melloramentu institusionál no dezenvolvimentu kapasidade iha nível munisípiu.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)