𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃Í𝐋𝐈 𝐇𝐄𝐓𝐀𝐍 𝐕𝐈𝐙𝐈𝐓𝐀 𝐊𝐎𝐑𝐓𝐄𝐙𝐈𝐀 𝐇𝐔𝐒𝐈 𝐄𝐌𝐁𝐀𝐈𝐗𝐀𝐃𝐎𝐑𝐀 𝐂𝐔𝐁𝐀

𝐃í𝐥𝐢, 𝟏𝟐 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Autoridade Munisípiu Díli (AMD) hetan vizita kortezia husi Embaixadora República Cuba iha Timor-Leste, MSc. Alina Aldama Inniss, ho objetivu atu aprezenta no diskuti proposta projetu merenda eskolar ba labarik sira iha kapitál Díli.

iha vizita ne’e Embaixadora Cuba aprezenta proposta projetu ba Prezidente Autoridade Munisípiu Díli, Sr. Francisco dos Santos kona-ba planu implementasaun projetu programa merenda eskolar inklui projetu agrikultura no projetu komunitariu.

PAM Díli hateten vizita kortezia ho Embaixadora Cuba ne’e, atu reforsa programa merenda eskolar husi ensinu pre-eskolar too ensinu báziku sentrál, inklui eskola públiku no privadu. “Iha vizita ida ne’e embaixadora Cuba mai ho proposta, primeiru atu apoiu programa merenda eskolar, liu husi produtu no ai-moruk ida ne’ebé mak kontribui hodi hasa’e labarik sira nia kresimentu no kapasidade hanoin ba estuda nian,”

Iha parte seluk, PAM Díli husu mós ba Embaixadora Cuba atu fornese atendimentu médiku ba pesoal saneamentu no jestaun merkadu AMD tanba Pessoal saneamentu sira loro-loron iha terenu hasoru direta foer no rai rahun sira.

Enkuantu Iha setór saúde, embaixadora hateten katak kooperasaun bilateral entre Timor-Leste no Cuba desde tinan 2005 to’o agora produz ona liu husi rihun ida atus lima (1.500) mediku. Husi total refere, balun estuda iha Cuba no balun iha Universidade Nasional Timor Lorosa’e (UNTL). Atualmente, iha mediku Timor-oan hamutuk ualu-nulu (80) mak estuda hela iha Cuba iha nivel espesialista.

Aleinde ne’e, Embaixadora Cuba fó oportunidade mós ba AMD atu partisipa iha programa formasaun iha Cuba no mos possibilidade hala’o mós formasaun iha Timor-Leste, hanesan parte husi kompromisu koperasaun atu hametin kapasidade institusionál no dezenvolvimentu rekursu umanu iha Municípiu Díli.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)