𝗣𝗔𝗠 𝗗Í𝗟𝗜 𝗛𝗔𝗟𝗔’𝗢 𝗔𝗕𝗘𝗥𝗧𝗨𝗥𝗔 𝗦𝗘𝗥𝗜𝗠Ó𝗡𝗜𝗔 𝗔𝗦𝗜𝗡𝗔𝗧𝗨𝗥𝗔 𝗧𝗘𝗥𝗠𝗨 𝗗𝗘 𝗔𝗦𝗘𝗜𝗧𝗔𝗦𝗔𝗨𝗡

𝗗í𝗹𝗶, 𝟮𝟳 𝗙𝗲𝘃𝗲𝗿𝗲𝗶𝗿𝘂 𝟮𝟬𝟮𝟲

Prezidente Autoridade Munisípiu Díli, Francisco dos Santos, hamutuk ho Diretor Geral Servisu Nasional Inteligensia (SNI) Longuinhos Monteiro, Diretor SEATOU, Diretor-Geral Terras Propriedades, Diretor Obras Públika no Reprezentante Administrador Postu Administrativu Nain Feto, Sefe Suku Bairu Pite, ohin hala’o serimónia asinatura termu de aseitasaun ba komunidade sira ne’ebé sei afeta iha futuru konstrusaun edifísiu Servisu Nasional Inteligensia (SNI). Serimonia ne’e hala’o iha Sede Suku Bairu-Pite Dili sesta feira ne’e.

Objetivu prinsipal husi atividade ida ne’e mak atu kompleta dokumentus legais no prepara prosesu indemnizasaun ba komunidade sira ne’ebé sei afeta iha futuru konstrusaun edifisiu Servisu Nasional Inteligensia (SNI).

Enkuntu Dadus ne’ebé uza bazeia ba levantamentu ne’ebé hala’o ona iha loron 30 fulan Outubru tinan 2025 liu bá, iha ne’ebé ekipa konjunta halo ona identifikasaun ba uma no rai ne’ebé afeta husi projetu ne’e.

Iha eventu ne’e, Prezidente Autoridade Munisípiu Díli hato’o katak prosesu ida ne’e la’ós hahú foun, maibé rezultadu husi servisu naruk ne’ebé halo ona ne’ebé antes ne’e hala’o ona. Nia mos husu ba komunidade atu kontinua uza konsiénsia no koopera ho Estadu ba Planu Projetu konstrusaun nebe tuir planu sei konstrui iha fulan Abril tinan ne’e (2026).

Alende ne’e mós PAM Dili hatete katak asinatura termu de aseitasaun ohin ne’e importante tamba atu garante satisfasaun parte sira hotu molok hahú konstrusaun. Nia mos agradese ba komunidade tamba prontu atu koopera ho governu.

Ho asinatura dokumentu termu de aseitasaun ne’e, governu bele kontinua ho prosesamentu pagamentu indemnizasaun ba benefisiáriu sira tuir rekizitu legal sira ne’ebé determina ona.

Fontes : (𝐌𝐞𝐝𝐢𝐚 𝐆𝐚𝐛. 𝐏𝐀𝐌)