𝐄𝐍𝐊𝐎𝐍𝐓𝐑𝐔 𝐊𝐎𝐍𝐒𝐄𝐋𝐋𝐔 𝐊𝐎𝐎𝐑𝐃𝐄𝐍𝐀𝐒𝐀𝐔𝐍 𝐌𝐔𝐍𝐈𝐒𝐈𝐏Á𝐋

𝐃í𝐥𝐢, 𝟏𝟖 𝐌𝐚𝐫𝐬𝐮 𝟐𝟎𝟐𝟔

Prezidente Autoridade Munisípiu Díli, Sr. Francisco dos Santos, hamutuk ho Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, SECAM nain tolu, Diretores Munisipaís, APA nain lima no Sefe-Suku sira, hala’o enkontru importante hodi koa’lia kona-ba asuntu rua hanesan preparasaun ba vizita Sua Exceléncia Primeiru Ministru, Kay-rala Xanana Gusmão no Aprezentasaun Regulamentu Retribuisaun Espasu Públiku. Enkontru ne’e hala’o iha salaun B Autoridade Munisipál Dili, kuarta-feira ne’e.

PAM Díli, hateten Reuniaun ne’e importente tamba koa’lia kona-ba preparasaun sira hodi simu vizita Exceléncia Primeiru Ministru, Kay-rala Xanana Gusmão, ne’ebé tuir planu sei vizita Autoridade Munisípiu Díli (AMD) hodi haree besik servisu Munisipál husi rezultadu avaliasuan kondisaun mínima.

“Husu ba Konsellu Koordenasaun Munisipál liu-liu SECAM nain tolu, Diretores sira, APA nain lima, atu kria reuniaun iha kada ekipa, koordena mós ho intelektual Munisípiu Dili nian, atu halo preparasaun masimu hodi simu vizita PM ne’ebe sei mai AMD.” Dehan PAM.

Iha fatin hanesan Komandante Polísia Nasionál Timor-Leste (PNTL) Munisípiu Dili, Superintendente Xefe Polísia Orlando Gomes, hatete PNTL sei koordena ho Autoridade Munisípiu dili, hodi fo apoiu másimu liu-liu parte seguransa Nian ba preparasaun simu vizita PM nian, nunee atividades sira bele la’o ho di’ak too remata.

Iha enkontru ne’e partisipa masimu husi Sekretária Munisipál Administrasaun no Finansas, Sekretariu Munisipál Administrasaun Planeamentu, Investimentu e Dezenvolvimentu Integradu, Sesretáriu Munisipál Assuntus Sosiais no Organizasaun komunitárias, Komandante Polísia Nasionál Timor-Leste (PNTL) Munisípiu Dili, Diretores Munisipáis, Administrador Postu Administrativu lima, Autoridade Suku no Funsionáriu Autoridade Munisípiu Díli.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)