𝐏𝐀𝐌 𝐃𝐈𝐋𝐈 𝐇𝐎 𝐖𝐅𝐏 𝐇𝐀𝐋𝐀’𝐎 𝐄𝐍𝐊𝐎𝐍𝐓𝐑𝐔 𝐇𝐎𝐃𝐈 𝐊𝐎𝐀𝐋𝐈𝐀 𝐊𝐎𝐍𝐀-𝐁𝐀 𝐅𝐎𝐑𝐓𝐈𝐅𝐈𝐊𝐀𝐒𝐀𝐔𝐍 𝐅𝐎𝐎𝐒 𝐀𝐓𝐔 𝐀𝐏𝐎𝐈𝐀 𝐌𝐄𝐑𝐄𝐍𝐃𝐀 𝐄𝐒𝐊𝐎𝐋𝐀𝐑

𝐃í𝐥𝐢, 𝟏𝟓 𝐀𝐛𝐫𝐢𝐥 𝟐𝟎𝟐𝟔.

Prezidente Autoridade Munisípiu (PAM) Dili, Sr. Francisco dos Santos hamutuk Word Food Program (WFP) halo enkontru ida hodi diskuti kona-ba fortifikasaun foos, nu’udar esforsu ida atu hasa’e kualidade nutrisaun ba komunidade, liu-liu ba labarik sira iha eskola.

Enkontru ne’e ho objetivu atu buka dalan hodi hadia kualidade ai-han neʼebé fó ba labarik sira iha eskola, no pontu prinsipal mak oinsá atu integra nutrisaun iha merenda eskolar liuhusi fortifikasaun fos ho vitamina no mineral essensial sira.

Kordenador WFP ba Munisipių sira, Sr. Inasio José dos Santos hateten katak, merenda eskolar la’ós de’it importante atu hasae prezensa estudante iha aula, maibé mos atu garante katak labarik sira hetan nutrisaun adekuadu atu suporta dezenvolvimentu sira, ho fortifikasaun fos, bele ajuda hamenus problema malnutrisaun ne’ebé sei afeta labarik barak iha Timor-Leste.

Kordenador WFP ba Munisípiu sira mos husu atu PAM Díli, noméia hela tékniku ida ne’ebe iha kapasidade diak atu hodi organiza liña Ministeriais iha Munisípiu nian no iha liña kordenasaun diak ho Servisu Munisipais liu-liu hanesan Edukasaun, Agrikultura, Siguransa Alimentar no mos Saude hodi estabelese ekipa monitorizasaun ba Merenda Eskolar neʼebé sei halo avaliasaun kada trimestral.

Entertantu iha PAM Dili nia intervensaun hateten, agora dadaun ita halo hela Fortifikasaun Fos hodi hatene didiak impaktu kona-ba Kresimentu labarik sira nian liu-liu iha Fíziku no hanoin, entaun ita tenki buka meios oinsa para hodi hatene nia rejultadu,tamba liu husi rejultadu ne’e mak ita foin bele buka meios hodi halo preparasaun ba material sira atu nune’e bele lori ba tau iha kada eskola hodi halo teste ba estudante sira iha fulan tolu dala ida, ho nune’e ita bele hatene kona-ba sira nia kresimentu antes no depois de ita implementa programa Merenda Eskolar.

Program Fortifikasaun Fos ne’e rasik dadaun ne’e implementa ona iha Munisípiu 4 maka hanesan Aileu, Covalima, Dili no Lautem, no tuir planu WFP sei konstrui dapur hamutuk 24 iha Munisípiu 4 no kada Munisípiu sei konstrui dapur 6 iha tinan ha’at nia laran hahu husi tinan 2026 to iha 2030.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)