𝐏𝐀𝐌 𝐃Í𝐋𝐈 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐄𝐍𝐊𝐎𝐍𝐓𝐑𝐔 𝐊𝐎𝐑𝐃𝐄𝐍𝐀𝐒𝐀𝐔𝐍 𝐁𝐀 𝐏𝐋𝐀𝐍𝐔 𝐄𝐒𝐓𝐀𝐁𝐄𝐋𝐄𝐒𝐈𝐌𝐄𝐍𝐓𝐔 𝐄𝐒𝐓𝐀𝐃𝐈U 𝐅𝐔𝐓𝐄𝐁𝐎𝐎𝐋 𝐈𝐍𝐓𝐄𝐑𝐍𝐀𝐒𝐈𝐎𝐍𝐀𝐋 𝐈𝐇𝐀 𝐓𝐀𝐒𝐈 𝐓𝐎𝐋𝐔

𝐃í𝐥𝐢 𝟐𝟎 𝐀𝐛𝐫𝐢𝐥 𝟐𝟎𝟐𝟔

Prezidente Autoridade Munisípiu (PAM) Díli,Sr. Francisco dos Santos hamutuk ho Sekretáriu Estadu Terras no Propriedades (SETP), Sr. Jaime Xavier Lopes, M.Eng. ho ekipa husi Federasaun Futebol Timor-Leste (FFTL) realiza enkontru koordenasaun hodi diskute asuntu kona-ba konstrusaun estádiu internasionál iha Timor-Leste.

Iha oportunidade ne’e, Sekretáriu Estadu Terras no Propriedades salienta katak prosesu identifikasaun terrenu ba estádiu antes ne’e hahú ona prosesu inisial. Iha faze dahuluk, proposta ne’e hetan ona aprovasaun iha Konsellu Ministru no ekipa téknika tun ba terrenu hodi halo levantamentu. Maibé, prosesu ne’e hetan impedimentu tanba Dioseze tolu la konkorda ho lokalizasaun inisiál ne’ebé besik ba altar iha Tasi Tolu.

Sekretáriu Estadu Terras no Propriedades mos hatutan katak iha tinan kotuk, nia rasik akompaña Primeiru-Ministru no Ministru Obras Públikas hodi halo vizita direta ba fatin alternativu. Iha vizita ne’e, Primeiru-Ministru orienta ekipa téknika Obras Públikas, halo levantamentu ho drone hodi avalia área. Husi observasaun, área iha Tasi Tolu, parte lorosa’e husi fatin misa Papa nian, iha poténsia boot tanba iha espasu sufisiénte ba estádiu no estasionamentu, hanesan padraun iha Portugal no Austrália.

Iha fatin hanesan PAM Díli hateten, hanesan Prezidente Autoridade Munisípiu Díli sente orgullu ho projetu Estadiun Internasional ne’e no prontu fo apoiu máximu tanba konstrusaun ida ne’e sei sai hanesan símbolu progresu no modernizasaun ba Munisipiu Dili, maibe hanesan Autoridade ida nafatin iha preokupasaun bo’ot ba komunidade sira ne’ebe hela iha fatin ne’eba.

“Área Tasi tolu ne’e komunidade barak mak hela iha ne’ebá tamba ne’e, nu’udar Prezidente Autoridade Munisípiu Díli sente preokupa, Kona-ba ida-ne’e, no hau iha nafatin kompromisu atu hala’o identifikasaun ne’ebé kle’an no envolve iha diálogu ho komunidade sira hodi garante katak desijaun ne’ebé foti sei halo tratamentu ba komunidade sira ho umanu, justu, no tuir lei no regulamentu sira ne’ebé aplikavel. Tanba, atu muda komunidade sira, labele ba naran muda de’it, maibé tenki respeita no konsidera sira, bainhira atu hasai presiza aloka orsamentu uituan ba sira nia hela fatin atu bele trata sira ho dignu .”

Alende ne’e, Prezidente FFTL, Sr. Nilton Telmo Gusmão dos Santos reforsa katak desizaun atuál konsidera sensibilidade relijioza. Tanba Dioseze tolu la aseita konstrusaun estádiu iha zona ne’ebé besik altar oin, ne’e duni Governu rekoñese área ne’e nu’udar espasu ho destinu relijiozu. Dadaun buka hela alternativa hodi estabelese zona desportiva.

Ho nune’e, enkontru ida ne’e nia objetivu prinsipal mak atu identifika espasu alternativu no avalia impaktu ba komunidade lokál, tanba rai sempre iha konsekuénsia entre ema ne’ebé hela iha área ne’ebá, tanba ne’e diskusaun ida-ne’e importante hodi buka solusaun hamutuk.Obras Públikas sei avalia infraestrutura privadu, Agrikultura sei halo inventáriu ba ai-horis, no Terras no Propriedades sei sukat rai.

Entertantu partisipantes ne’ebe partisipa iha enkontru ne’e mak hanesan, Prezidente FFTL ho nia ekipa, Administradór Postu Dom Aleixo, Sr. José Soares, Xefe Suku Komoro, Sr. Elizeo José S. Marçal, Diretór Jerál Terras no Propriedades, Dr. Lucas António da Costa, Diretór Nasionál Terras no Propriedades, Xefe Departamentu sira, Diretór Nasionál Servisu Kadastru sesante, inklui ekipa téknika iha ámbitu DGTP.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)