SMPC-GDN NO ONG IMPLEMENTA ATIVIDADE SENSIBILIZASAUN RISKU DEZASTRE NATURAIS BA KONSELLU SUKU IHA POSTU ADMINISTRATIVU METINARO

Dili, 06 de Maio- Lensa Atividade Servisu Munisipal Protesaun Sivil no Jestaun Dezastre Naturais liu husi Diretor SMPC-GDN Sr. Jacinto Freitas implementa atividade sensibilizasaun risku dezastre naturais ba iha membru Konsellu Suku ne’ebé kompostu husi Pontu Fokal APC no mos Asaun Sosial, Xefe Aldeia, delegadu/a Xefe Suku Mantelolau, Wenunuc, Sabuli, Postu Administrativu Metinaro, Munisípiu Dili.

Atividade refere hala’o iha Postu Administrativu Metinaro no abertura husi Administrador Postu Metinaro Sr. Domingo Soares, ho prezensa Diretor SMPC-GDN, Xefe Departamentu Prevensaun Informasaun Sr. Agripino P. Gracias Xefe Departamento ONG Sr. Domingos Oki, Xefe Suku Mantelalau Sr. Sergio Asis L. S. Dias, no mos Xefe Wenunu Sr. Jose dos Santos.

Iha intervensaun, Diretor SMPC-GDN, Sr. Jacinto Freitas hateten “Ami husi SMPC-GDN Lei fo dalan atu implementa atividade deziminasaun ka sensibelizasaun konaba Area Risku Dezastre Naturais, tanba saida mak ekipa SMPC-GDN hakarak Implementa atividade refere ba iha Konsellu Suku, tanba Konsellu Suku sira mak sai hanesan matan no tilun ba komunidade sira, no bele antisipa lalais komunidade sira iha situasaun dezastre naturais ruma iha Baze”.

Diretor SMPC-GDN ne’e subliña “Objetivu ohin loron ekipa SMPC-GDN implementa atividade sensibilizasaun ida ne’e hodi partilha ba Konsellu Suku, Pontu fokal APC, Pontu Fokal Asaun Sosial, ho fiar katak bainhira Konsellu Suku sira hetan informasaun sira liu husi sensibiizasaun ida ne’e bele fahe tutan fali ba komunidade sira”.

Iha intervensaun abertura nian, Administrsaun Postu Metinaro Sr. Domingos Soares, husu ba konsellu Suku no pontu fokal APC no Sosial sira ne’ebé mak hetan ka simu informasaun husi SMPC-GDN Munisípiu Dili mai fahe informasaun sira kona-bá risku dezastre naturais, tenki toma atensaun didiak atu nune’e wainhira akontesimentu risku iha Baze bele informa lalais ba iha Autoridade lokal sira.

Saseluk Xefe Suku Wenunuc hateten sensibilizasaun ne’e hanesan bukae ida ba ita atu nune’e Ita transmiti tutan fila fali ba Ita nia komunidade sira atu nune’e ba oin Ita bele miniza risku dezastre naturais iha Ita nia suku.

Fontes : (SMPC-GDN)