𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃Í𝐋𝐈 𝐇𝐀𝐋𝐀’𝐎 𝐄𝐍𝐊𝐎𝐍𝐓𝐑𝐔 𝐊𝐎𝐍𝐒𝐄𝐋𝐋𝐔 𝐊𝐎𝐍𝐒𝐔𝐋𝐓𝐈𝐕𝐔 𝐌𝐔𝐍𝐈𝐒𝐈𝐏Á𝐋 (𝐊𝐊𝐌)

𝐃𝐢𝐥𝐢, 𝟏𝟓 𝐌𝐚𝐢𝐮 𝟐𝟎𝟐𝟔

Autoridade Munisípiu Díli liuhusi Prezidente Autoridade Munisípiu Díli, Sr. Francisco dos Santos, konvida membrus Konsellu Konsultivu Munisipál (KKM) hodi hala’o enkontru iha Salaun B AMD, atu diskute no partilla prioridade dezenvolvimentu iha Munisípiu Díli.

Partisipantes sira iha enkontru ne’e kompostu husi Sekretáriu Munisipál nain 3, chefe suku sira iha Munisípiu Díli hamutuk ema nain 31, reprezentante lia-na’in sira ne’ebé hala’o funsaun iha munisípiu, reprezentante veteranu, setor privadu, sociedade sivil, ONG sira, diretór munisipál sira no delegasaun teritorial inklui APA sira husi kada postu, no mos reprezentante husi Komandu PNTL Munisípiu Díli.

Iha enkontru refere, asuntu prinsipál haat mak diskute:

1. Regimentu Konsellu Konsultivu Munisipál (KKM) Díli;

2. Aprezentasaun projetu sira husi PDM ne’ebé sei implementa iha Munisípiu Díli

3. Aprezentasaun husi PNDS konaba planu projetu sira ne’ebé sei implementa iha postu administrativu sira iha Munisípiu Díli, hanesan Cristu Rei, Dom Aleixu, Metinaru, Nain Feto no Vera Cruz, ho objetivu atu promove dezenvolvimentu no hadi’a moris komunidade sira iha área refere.

4. Preparasaun komemorasaun loron Proklamasaun Independensia 20 de Maio.

Prezidente Autoridade Munisípiu Díli, Sr. Francisco dos Santos, haktuir katak enkontru KKM importante tebes atu hametin koordenasaun no partisipasaun entre governu munisipál ho parseiru sira hotu iha prosesu planeamentu no implementasaun programa dezenvolvimentu iha Munisípiu Díli.

Enkontru ne’e mos sai hanesan espasu atu hametin kolaborasaun entre autoridade lokal, lider komunitáriu sira no parseiru dezenvolvimentu sira, hodi asegura katak programa no projetu sira ne’ebé sei implementa bele responde ba nesesidade povu no lori benefísiu ba komunidade tomak.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)