𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃Í𝐋𝐈 𝐀𝐒𝐈𝐍𝐀 𝐓𝐄𝐑𝐌𝐔 𝐀𝐒𝐄𝐈𝐓𝐀𝐒𝐀𝐔𝐍 𝐇𝐎 𝐊𝐎𝐌𝐔𝐍𝐈𝐃𝐀𝐃𝐄 𝐀𝐅𝐄𝐓𝐀𝐃𝐔

𝐃í𝐥𝐢, 𝟐𝟗 𝐌𝐚𝐢𝐮 𝟐𝟎𝟐𝟔

Autoridade Munisípiu Díli ofisialmente asina ona termu aseitasaun indeminizasaun ho komunidade afetadu sira ne’ebe hela besik iha Edifisiu Edukasaun Munisípiu Díli Suku Komoro,nu’udar parte ida husi esforsu atu garante prosesu dezenvolvimentu ne’ebé transparente, inkluzivu no respeita direitu komunidade lokal sira.

Serimónia asinatura ne’e hala’o iha edifísiu AMD ho partisipasaun husi Diretór servisu Edukasaun Munisípiu Díli, Sr. Sabino da Costa ho ekipa, Xefe Departementu Planeamentu ho ekipa, Xefe Departementu Obras Públika, no reprezentante komunidade afetadu.

Prezidente Autoridade Munisípiu Díli, Sr. Francisco dos Santos hateten katak, indeminizasaun ne’e halo bazeia ba dadus ne’ebe mak ekipa tékniku sira foti, hodi fo tuir rejolusaun Governu ne’ebe mak fo sai iha dia 24/2022 17 de Agostos hodi halo indeminizasaun bazeia ba Medida Uma no Ai horis, tamba ita hamosu ona rejolusaun iha Parlamentu Nasional hodi regulariza no hamosu ona indeminizasaun atu dignifika fila fali sidadaun sira nia direitu.

Iha fatin hanesan Prezidente Autoridade Munisípiu Díli hato’o mos apresiasaun bo’ot ba parte hotu ne’ebe maka halo aprosimasaun diak ho komunidade sira to ikus hetan rejultadu no bele iha akordu satisfasaun ida, no PAM mos orgulhu ho komunidade sira ne’ebe komprende ona situasaun nasaun nian liu-liu Munisípiu Díli ,tamba ita hotu-hotu hakarak iha situasaun ne’ebe diak atu halo atendimentu públiku ida ne’ebe mais dignu iha área Edukasaun entaun ita presija iha espasu ne’ebé luan hodi halo atendimentu.

Tamba ne’e husu nafatin ba ita bo’ot sira ne’ebe ohin marka prejensa iha ne’e atu iha koperasaun diak hodi hamamuk fatin bainhira tempu to atu nune’e ekipa sira hahu halo servisu.

Ho asinatura termu aseitasaun ida-ne’e, espera katak relasaun entre governu no komunidade bele sai forte liu tan, no projetu dezenvolvimentu sira iha Suku Komoro bele kontribui ba moris di’ak no sustentabilidade ba povu nian.

Entertantu total uma kain ne’ebe mak asina termu aseitasaun ne’e hamutuk ha’at ho Montante orsamentu ne’ebe mak la hanesan.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)