Ekipa PARTISIPA, Sra. Emer Purdon (Team Leader) no Sr. Abilio de Araujo (Adjuntu Team Leader), hala’o enkontru ho PAM Dili no Diretor Servisu Munisipál PNDS, hamutuk ho equipa tékniku PNDS.

Enkontru ne’e nia objetivu mak atu atualiza kona ba faze segundu apoiu PARTISIPA nian ba munisípiu sira.iha tempu hanesan, PARTISIPA hato’o agradesimentu ba kooperasaun dia’ak ne’ebé hala’o ona entre PARTISIPA no SM PNDS durante tinan barak.

Iha diskusaun ne’e, PAM Dili hato’o apresiasaun ba apoiu PARTISIPA no subliña área prioritária sira ba kolaborasaun futura, inklui: adaptasaun no mitigasaun mudansa klimátika (Climate Change), reforçu sistema arkivamentu no jestaun dokumentál, no digitalizasaun servisu inklui utilizasaun teknolójia AI.

PARTISIPA reafirma nia kompromisu atu kontinua servisu hamutuk no buka oportunidade sira atu fó apoiu efetivu liután ba dezenvolvimentu institusionál no servisu públiku iha munisípiu Dili inklui oin-sa atu hatan ba nesesidade prioritariu sira ne’ebe PAM Dili meniona.

Diretor Servisu Munisipál PNDS mos aproveita oportunidade ida-ne’e atu hato’o nia agradesimentu ba apoiu no parseria ne’ebé PARTISIPA fó desde hahú implementasaun programa iha tinan 2013.