𝐃í𝐥𝐢, 𝟎𝟓 𝐀𝐠𝐨𝐬𝐭𝐮 𝟐𝟎𝟐𝟔

Autoridade Munisípiu Díli (AMD) kontinua hametin relasaun kooperasaun internasionál liuhusi enkontru ho Governu Metropolitana Tokyo, ho objetivu atu aumenta servisu hamutuk iha área dezenvolvimentu munisipál, kapasitasaun rekursu umanu, no jestaun servisu públiku.

Enkontru ne’e realiza ho partisipasaun reprezentante sira husi AMD no delegasaun Governu Metropolitana Tokyo, ne’ebé diskute oportunidade sira atu reforsa parseria entre instituisaun rua. Iha okaziaun ne’e, parte rua mós troka esperiénsia kona-ba jestaun urbana, planeamentu dezenvolvimentu, protesaun ambientál, no melhoria servisu ba komunidade.

Iha okaziaun ne’e Prezidente Autoridade Munisípiu (PAM) Díli, Sr. Francisco dos Santos, hateten katak kooperasaun ho Governu Metropolitana Tokyo importante tebes tanba bele kontribui ba dezenvolvimentu munisípiu ne’ebé modernu, sustentavel no responde di’ak liu ba nesesidade sidadaun sira.

“Ami nia parte agradese tebes tanba bele simu vizita ida ne’e, no ami nafatin presiza ita boot sira nia ajuda Iha parte hotu, liu liu iha área infraestrutura bázika, jestaun dezastre, no landscape gardening.”

Delegasaun Governu Metropolitana Tokyo reafirma nia kompromisu atu kontinua suporta no dezenvolve programa kooperasaun ho AMD, liuhusi fahe koñesimentu tékniku, treinamentu ba funsionáriu sira, no implementasaun atividade sira ne’ebé bele fó benefísiu ba komunidade.

Liuhusi kooperasaun ida ne’e, AMD hein katak relasaun amizade no parseria entre Munisípiu Díli no Governu Metropolitana Tokyo sei nafatin metin, hodi promove dezenvolvimentu sustentavel, hadi’a governasaun lokál, no aumenta kualidade moris povu iha Munisípiu Díli.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)