𝐃í𝐥𝐢, 𝟕 𝐀𝐠𝐨𝐬𝐭𝐮 𝟐𝟎𝟐𝟔

Autoridade Munisípiu Dili (AMD) hala’o enkontru ho World Food Programme (WFP) no Centru Logístiku Nasionál (CLN) hodi diskute planu akordu kooperasaun ba implementasaun Programa Merenda Eskolár iha Munisípiu Dili, ne’ebé hetan apoiu husi Uniaun Europeia no previstu atu hahú iha tinan 2027.

Enkontru ne’e nu’udar kontinuidade husi diskusaun uluk entre parte rua ho Prezidente Autoridade Munisípiu Dili, Sr. Francisco dos Santos. Ho nune’e enkontru ohin nee Foku prinsipál mak atu estabelese kuadru kooperasaun entre AMD no CLN hodi implementa atividade fortifikasaun foos ba Eskola Básika Filial (EBF) sira iha Munisípiu Dili.

Liu husi programa ne’e, WFP sei kontinua fó apoiu tékniku no fasilita koordenasaun entre CLN no AMD, inklui akompañamentu no monitorizasaun durante implementasaun programa, hodi apoia hadi’ak nutrisaun estudante sira no promove jestaun programa ne’ebé transparente no efisiente.

Iha enkontru ne’e, AMD mós rekomenda ba WFP no CLN atu utiliza foos lokál ho porsentu 25 ba nesesidade Programa Merenda Eskolár iha Munisípiu Dili, hodi fó oportunidade ba produsaun lokál no hasa’e partisipasaun agrikultór sira.

Planu akordu refere sei implementa tuir lei no regulamentu Repúblika Demokrátika Timor-Leste, inklui Polítika Nasionál Programa Merenda Eskolár, padraun seguransa alimentár, padraun fortifikasaun foos, no prosedimentu administrativu no finanseiru ne’ebé vigora.

Tuir planu akordu ne’e, CLN sei responsabiliza ba fornesimentu foos fortifikadu tuir padraun kualidade ne’ebé konkorda ona, jere sistema lojístika inklui armazenamentu, transporte no distribuisaun ba eskola benefisiáriu sira, mantein rejistu stók no entrega, no informa AMD bainhira iha atrazu ka problema ruma relasiona ho fornesimentu.

Programa Merenda Eskolár ne’e previstu sei benefísia estudante hamutuk 60.405, kompostu husi mane 31.102 no feto 29.303, iha Eskola Básika Filial (EBF) hamutuk 89 iha Munisípiu Dili.

Kooperasaun entre AMD, WFP no CLN ne’e espera bele hametin implementasaun Programa Merenda Eskolár iha Munisípiu Dili, atu garante estudante sira asesu ba alimentasaun ne’ebé nutritivu no seguru, nune’e suporta saúde, dezenvolvimentu no aprendizajen labarik sira.

Fontes : (𝗠𝗲𝗱𝗶𝗮 𝗚𝗮𝗯-𝗣𝗔𝗠)