𝐏𝐑𝐄𝐙𝐈𝐃𝐄𝐍𝐓𝐄 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃𝐈𝐋𝐈 𝐇𝐀𝐋𝐀’𝐎 𝐕𝐈𝐙𝐈𝐓𝐀 𝐒𝐄𝐑𝐕𝐈𝐒𝐔 𝐁𝐀 𝐏𝐎𝐒𝐓𝐔 𝐀𝐃𝐌𝐈𝐍𝐈𝐒𝐓𝐑𝐀𝐓𝐈𝐕𝐔 𝐕𝐄𝐑𝐀 𝐂𝐑𝐔𝐙.

𝐃í𝐥𝐢 𝟏𝟑 𝐀𝐠𝐨𝐬𝐭𝐮 𝟐𝟎𝟐𝟔

Kinta feira ne’e prezidente autoridade munisipiu dili, sr. Francisco dos santos hala’o vizita trabalho iha postu administrativu vera cruz ho objetivu atu halo dialogo ho sefe suku no sefe aldeia, konsellu komunitariu no mos linha sektorais iha postu refere hodi rona diretamente preokupasaun komunidade nian nebe durante ne’e infrenta iha suku no aldeia sira.

Iha vizita ne’e, sefe suku no sefe aldeia sira hatoo preokupasaun sira nebe durante suku no aldeia hasoru hanesan problema Estrada, bee mos, seguransa iha bairu menus, engrafamentu, komunidade sira nebe kontinua harii uma iha foho lolon no seluk tan.

Hatan ba preokupasaun nee, PAM husu ba sefe suku no sefe aldeia sira atu hare didiak servisu prioridade sira iha suku no aldeia hodi hatene nesesidade no preokupasaun komunidade nian.

Nia mos hatutan katak Autoridade Munisipál Díli sei kontinua garante servisu prioridade iha suku sira, liu husi Planu Dezenvolvimentu Komunitáriu ka PDK ne’ebe sai nu’udar baze atu identifika prioridade no projetu dezenvolvimentu ne’ebé presiza responde ba nesesidade komunidade no mos Problema ka prioridade ne’ebé identifika bele lori ba iha prosesu konsultasaun no diskusaun iha Konsellu Konsultivu Munisipál.

“Hau husu ba Sefe Suku no Sefe Aldeia atu kontinua halo identifikasaun, verifikasaun no levantamentu dadus kona-ba problema no nesesidade komunidade. Papel imi-nia importante tebes, tanba dadus ne’ebé halibur hosi suku no aldeia sei ajuda Autoridade Munisipál atu komprende situasaun no determina prioridade no resposta ne’ebé apropriadu ba komunidade.” Dehan PAM

Alende ne’e PAM mos salienta katak AMD sei servisu hamutuk ho Komandu PNTL Munisipiu Dili hodi halo kontrolu ba game online iha sidade Dili.

“Relasiona ho atividade jogu online ne’ebé mosu iha fatin fatin, inklui iha área suku sira, Autoridade Munisipál Díli sei kontinua halo koordenasaun ho Komandu PNTL Munisípiu Díli atu halo kontrolu no monitorizasaun iha terenu hodi kombate krime sira iha Dili laran no kontrolu ida-ne’e importante atu garante seguransa no ordem públika iha komunidade.”

Ikus liu PAM mos enfatiza katak kona ba problema parazen ka ema hirak nebe hola kareta motor maibe laiha fatin hodi para, ba oin governu sei halo planu hodi halo estasionamentu iha bairu bairu atu hirak nebe laiha fatin parazen bele utiliza estasionamentu nebe governu prepara ona hodi selu taxa ba governu.

Administradór Postu Administrativu Vera Cruz Teresa da Costa Mariano konsidera vizita servisu PAM nu’udar oportunidade importante atu hametin komunikasaun no koordenasaun entre autoridade munisipál no autoridade lokal sira, liuliu iha identifikasaun prioridade no nesesidade komunidade nian.

Alende ne’e mos nia hatete katak Sefe Suku no Sefe Aldeia iha papel importante nu’udar matadalan ba servisu iha nivel suku no aldeia. No tuir nia katak autoridade lokal sira mak besik liu ho komunidade, nune’e sira bele komprende diak liu situasaun, nesesidade no prioridade ne’ebé iha iha área sira.

“liuhosi koordenasaun entre Postu Administrativu, Sefe Suku no Sefe Aldeia, programa no atividade sira ne’ebé planeia sei bele implementa ho diak no tuir nesesidade komunidade. Koordenasaun ne’e importante atu garante katak servisu ne’ebé hala’o iha nivel suku no aldeia bele kontribui ba dezenvolvimentu komunidade” dehan APA Vera Cruz.

iha fatin hanesan, Segundu Komandante PNTL Munisípiu Díli Superentendente Luis da Silva hatete katak PNTL sei alerta kona ba kodigu Estrada no krime online nian nebe buras iha timor-leste.

Nia mos hatutan katak munisipiu dili oras ne dadaun nakonu ho engrafamentu tamba populasaun aumenta ba bebeik no transporte mos kotinua aumenta maibe barak mak seidauk iha konsiensia hodi konduz kareta no motor iha dalan publiku entaun ikus mai hamosu engrafamentu no asidente.

“Ba problema engarafamentu ne’e akontese barak tamba primeiru menus konsiensia husi ema sira nebe lori transporte no segundu mak estasionamentu iha loja sira seidauk iha, entaun sira ne mos prejudika movimentu kareta motor tamba kareta no motor para la tuir fatin no ami mos sei hare ba joven sira ne’ebe utiliza motor kanu resin halai iha dili laran” Segundu komandante Munisípiu Dili.

Ikus liu nia mós ko’alia kona-ba krime sira ne’ebé dadaun ne’e buras iha Timor-Leste, inklui atividade “jogu online” ne’ebé sai ona preokupasaun no polemika iha públiku.

Nia hatete katak, situasaun ne’e presiza tau atensaun no halo koordenasaun hamutuk entre PNTL, Autoridade Munisipál no entidade relevante sira, atu halo prevensaun oinsa atu responde ba atividade sira ne’ebé hamosu risku ba seguransa no ordem públika.

Partisipa iha vizita ofisial ne’e husi komandante eskuadra vera cruz, OPS, Administrador husi Postu tolu, Diretores Munisipais , Sefe Suku no Sefe Aldeia husi postu vera cruz no funsionariu sira.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)