𝐏𝐀𝐌 𝐃Í𝐋𝐈 𝐇𝐀𝐋𝐎 𝐀𝐁𝐄𝐑𝐓𝐔𝐑𝐀 𝐁𝐀 𝐉𝐎𝐆𝐔 𝐏𝐕𝐂 𝐂𝐔𝐏

𝐃í𝐥𝐢, 𝟐𝟏 𝐀𝐠𝐨𝐬𝐭𝐮 𝟐𝟎𝟐𝟔

Prezidente Autoridade Munisípiu Díli, Sr. Francisco dos Santos, halo abertura ofisiál ba atividade desportiva PVC Cup, ne’ebé organiza iha Postu Administrativu Vera Cruz (PVC), ho tema “Hametin Memória Istóriku, Habelar Unidade no Patriotismu ba Jerasaun Foun”, hodi marka no selebra Loron Konsulta Popular.

Atividade ne’e realiza ho objetivu atu hametin partisipasaun komunidade, no promove espíritu unidade, amizade no solidariedade entre lideransa lokal, juventude no komunidade.

PVC Cup mos sai nu’udar momentu importante atu fó espasu ba komunidade sira hodi hasoru malu, promove saúde liuhusi desportu, no hametin relasaun entre komunidade sira iha Postu Administrativu Vera Cruz.

Administradora Postu Administrativu Vera Cruz, Sra. Teresa da Costa Mariano, hato’o apresiasaun no agradese ba juventude sira ne’ebé iha inisiativa no hakarak servisu hamutuk ho autoridade lokal hodi realiza atividade desportiva ne’e.

“Ha’u hato’o agradese wa’in tebes ba juventude, xefe suku no xefe aldeia sira ne’ebé fó sira-nia kontribuisaun no hakarak servisu hamutuk ho Postu Vera Cruz hodi realiza jogu ida ne’e. Atividade ne’e realiza hodi fó onra ba ita-nia erói sira ne’ebé luta ba ukun-rasik-an. Tanba ne’e, ha’u husu ba juventude sira atu nafatin kria unidade, pás no estabilidade liuhusi atividade desportiva hanesan ne’e.”

Iha sesaun abertura, PAM Díli hato’o apresiasaun ba parte hotu-hotu ne’ebé partisipa no fó apoiu ba atividade ne’e. Nia mós espera katak atividade desportiva hanesan PVC Cup bele kontinua no sai nu’udar meiu ida atu hametin unidade no partisipasaun komunidade, liuliu iha atividade sira ne’ebé relasiona ho selebrasaun Loron Konsulta Popular ba Dala 27.

PAM Díli mós apela ba partisipante sira atu haree PVC Cup nu’udar jogu amizade, la’ós de’it atu buka vitoria.

“Atividade ida ne’e hanesan jogu amizade. Tanba ne’e, labele haree de’it ba sé mak joga maka’as liu no sé mak manán, no sira ne’ebé lakon sente katak sira lakon. Jogu ida ne’e hanesan jogu amizade atu ita hotu bele hatudu ita-nia talentu, respeita malu iha komunidade no nafatin dezenvolve espíritu desportivu ne’ebé di’ak.”

Nia subliña katak juventude sira tenki uza sira-nia talentu no espíritu desportivu hodi kontribui ba hametin unidade, respeitu no harmonia iha komunidade.

Atividade PVC Cup sei hala’o husi loron 21 Agostu to’o 4 Setembru 2026, no hetan apoiu orsamentál husi Ministériu Juventude, Desportu, Arte no Kultura (MJDAK) ho montante US$5,000.

Atividade ne’e espera atu sai nu’udar plataforma ida ba juventude no komunidade sira iha Postu Administrativu Vera Cruz hodi promove desportu, hametin amizade, unidade no solidariedade, no mós hodi fó kontribuisaun ba preservasaun memória istórika no espíritu patriotismu ba jerasaun foun.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)