DILI, 03 fevereiru 2022 (TATOLI) – Governu liuhosi Ministru Prezidénsia Konsellu Ministru (MPKM), Fidelis Manuel Leite Magalhães, kinta ne’e lansa website identidade (ID) únika ne’ebé kria hosi  Teknolojia Informasaun no Informasaun (TIC, sigla portugés hodi dezenvolve informasaun sira kona-ba boa governasaun.

Objetivu hosi kriasaun sítiu ne’e hodi hafasil serbisu infromasaun sira ho kualidade hosi Governu ba sosiedade sivíl no sidadaun sira iha territóriu nasionál. Sítiu ne’e kria hosi TIC Timor, Institutu Públiku (TIC, IP).

Ministru Fidelis Manuel Leite Magalhães, informa, lansamentu website ne’e atu akompaña progresu serbisu Governu eletróniku nian, entaun ho planu implementasaun verifikadór website únika liuhosi TIC Timor.

Programa ne’e nu’udar área prioridade ba dala-neen, hodi VIII Konstitusionál tinan 2022 liga ba boa governasaun, tanba prosesu ne’e formalmente ne’ebé hala’o dahuluk liu kona-ba prontidaun Governu nian, ne’ebé sei prezentemente ho objetivu atu hatudu kondisaun situasaun atuál ba implementasaun Tékologia Informasaun Tomunikasaun.

“Rezultadu hosi estudu ne’e importante, tanba reprezenta ezersísiu importante ba dezenvolvimentu polítika ida hosi Governu eletróniku ho nesesidade Governu nian, nune’e iha futuru ita bele presta servisu di’ak, liuliu ba iha populasaun no instituisaun públiku sira,” Fidelis Leite Magalhães, ko’alia iha serimónia lansamentu ne’e iha otél Novo Turizmu.

“Tán ne’e TIC Timor, I.P, mós prepara lei informasaun ida-ne’e liuhosi website úniku, hodi disemina no sensibiliza ho klaru, transparánsia no responsavél iha implementasaun programa iha ID úniku nian ba públiku ein-jerál,” nia katak.

Prezidente Konsellu Administrasaun, TIC Timor, I.P, Roberto Caitano de Sousa Vicente, esplika, programa ID únika ne’e sei fasilita Governu hodi kuantifika no kualifika serbisu públiku sira, hodi redús identidade falsu no dupla, identidade anónimu ka deskoñesidu, redús frauda no hafasil serbisu administrasaun públiku iha futuru.

Bazea ba rezolusaun Governu númeru 09/2020, 19 marsu 2020, TIC Timor, I.P, simu papél ida atu lidera komisaun téknika eventuál ho apoia téknika hosi diresaun jerál servisu rejistu notariádu, Ministériu Justisa ho Ministériu Reforma Lejizlativa no Asuntu Parlamentár no agora iha Prezidénsia Konsellu Ministru.

Importánsia hosi website únika

Dahuluk, identidade únika nu’udar rekizitu fundamentál ba implementasaun Planu Estratéjiku Dezenvolvimentu Nasionál (PEDN 2011-2030), espesifikamente iha pontu dala lima (5), liga ba kuadru institusionál atu hadi’a téknolojia informasaun no komunikasaun hodi apoia Governu konjunta no inisiativa Governu eletrónika.

Daruak, identidade únika sai mós hanesan rekizitu xave ba implementasaun Governu eletrónika hosi programa reforma administrativa (2019-2023), no nu’udar área prioridade VIII Governu Konstitusionál nian.

Datoluk, orsamentu ba identidade únika propoin iha OJE 2022 ho montante millaun $6-resin, no aprovadu iha millaun $3, sufisiente ba akizisaun ekipamentu no materiál mínimu (hardware no software) ba estabelesimentu sistema identidade únika no rekrutamentu rekursu umanu.

Dahaat, projetu ne’e hosi TIC Timor, I.P, iha diresaun únika nian nu’udar entidade tranzitória ne’ebé durante ne’e implementa projetu lei, halo preparasaun hodi muda ba ajénsia iha futuru.

Dalimak, daudaun ne’e halo hela preparasaun dokumentu ba aprovizionamentu ne’ebé hetan tulun, hosi kolaborasaun serbisu ho Banku Dezenvolvimentu Aziátiku (ADB, sigla inglés).

Daneen, agora dadaun finaliza ona termu referénsia ba rekrutamentu ba pesoál xave sira, no ikusliu kontinua rona opiniaun sira kona-ba oinsá bele implementa projetu ne’e ho susesu.