Servisu Munisipal Patrimonio no Logistika (SMPL-MD)

Diretor Servisu Munisipal de Lojístika e Patrimôniu

Octávio Vieira do Amaral

Contacto:

77887670

DIPLOMA-MINISTERIAL-No-85-2023

Seksaun IV

Servisu Patrimóniu no Lojístika Munisipál

Artigu 13.º

Misaun

Servisu Patrimóniu no Lojístika Munisipál mak servisu Autoridade Munisipál nian ne’ebé nia misaun mak atu fó apoiu tékniku no administrativu ba respetivu Prezidente Autoridade Munisipál no ba órgaun no servisu sira seluk Autoridade Munisipál nian iha área jestaun lojístika no jestaun patrimóniu nian.

Artigu 14.º

Tarefa sira

1. Servisu Patrimóniu no Lojístika Munisipál nia knaar sira, iha área jestaun patrimóniu nian maka:

a) Organiza no atualiza inventáriu patrimóniu Estadu nian ne’ebé atribui ba Autoridade respetiva;

b) Propoin ba respetivu Prezidente Autoridade Munisipál nian planu kona-ba distribuisaun bens imóveis no bens móveis Estadu nian ne’ebé liga ba Autoridade Munisipál hosi nia órgaun no servisu sira;

c) Halo inventáriu, tau rótulu no rejista bein móvel sira Estadu nian ne’ebé iha ligasaun ho Autoridade Munisipál respetiva molok halo sira-nia distribuisaun entre ninia órgaun no servisu sira;

d) Identifika, rejista no fó-hatene ba respetivu Prezidente Autoridade Munisipál nian kona-ba estragu, lakon ka obsolesénsia hosi sasán Estadu nian ne’ebé atribui ba Autoridade Munisipál;

e) Propoin ba Prezidente Autoridade Munisipál respetivu kona-ba terseirizasaun obra ka reparasaun ka obra konservasaun bein imóvel, veíkulu transporte, mákina, mobiliáriu no ekipamentu eskritóriu nian;

f) Asegura operasionalidade bein imobiliáriu Estadu nian hotu-hotu ne’ebé liga ba respetiva Autoridade Munisipál no garante funsionamentu di’ak ba bee-moos, saneamentu báziku, eletrisidade, asesu ba internet no sistema ar-kondisionadu ida-idak, lahó prejuizu ba ema seluk;

g) Halo monitorizasaun ba mudansa sira iha situasaun patrimóniu Estadu nian ne’ebé liga ba Autoridade Munisipál respetiva, liuliu bainhira akontese transferénsia, anulasaun, reparasaun no hadi’a;

h) Kolabora ho Servisu Aprovizionamentu Munisipál no Servisu Finansas Munisipál hodi prepara prosedimentu, kontratu no protokolu aprovizionamentu ne’ebé iha impaktu ba patrimóniu;

i) Fó instrusaun ba prosesu sira hodi simu obra urbanizasaun no konstrusaun nian, atu hatama iha Estadu nia patrimóniu, ne’ebé hala’o iha munisípiu;

j) Estuda, dezenvolve no propoin ba respetivu Prezidente Autoridade Munisipál sistema kontrolu konsumu ne’ebé promove jestaun efisiente liu ba rekursu Autoridade Munisipál nian;

k) Hala’o kna’ar sira seluk iha área jestaun patrimóniu nian ne’ebé autoridade superiór ida fó ba nia no ne’ebé la’ós responsabilidade hosi órgaun ka servisu seluk hosi Autoridade Munisipál.

2. Servisu Patrimóniu no Lojístika Munisipál nia knaar sira, iha ámbitu jestaun lojístika nian, maka:

a) Identifika, rejista no halo inventáriu ba frota veíkulu motorizadu sira Estadu nian, ne’ebé atribui ba Autoridade Munisipál respetiva;

b) Propoin ba respetivu Prezidente Autoridade Munisipál nian kona-ba planu ba distribuisaun no utilizasaun veíkulu motorizadu sira hosi órgaun no servisu sira Autoridade Munisipál nian;

c) Simu no rejista pedidu uzu veíkulu Estadu nian ne’ebé atribui ba Autoridade Munisipál respetiva ne’ebé la atribui espresa ba Prezidente Autoridade Munisipál respetiva, Sekretáriu Munisipál, Diretór Servisu Munisipál sira ka Administradór sira Postu Administrativu nian;

d) Entrega no simu veíkulu Estadu nian ne’ebé atribui ba Autoridade Munisipál respetiva no rejista aktu sira-ne’e tuir regra ne’ebé vigora;

e) Rekuza pedidu sira kona-ba entrega ka utilizasaun veíkulu Estadu nian ne’ebé atribui ba Autoridade Munisipál respetiva, bazeia ba sira-nia ilegalidade, oportunizmu ka laiha justifikasaun ba finalidade ne’ebé entrega ka utilizasaun ne’e pretende ba;

f) Rejistu kilometru no konsumu veíkulu Estadu nian ne’ebé aloka ba Autoridade Munisipál respetiva iha baze mensál no informa ba Prezidente Autoridade Munisipál kona-ba sira;

g) Propoin ba respetivu Prezidente Autoridade Munisipál nian planu kona-ba distribuisaun mobiliáriu, mákina no ekipamentu ruma hosi órgaun no servisu sira Autoridade Munisipál nian;

h) Entrega, no rejista entrega, ba mobiliáriu, mákina no kualkér ekipamentu ne’ebé atribui ba Autoridade Munisipál respetiva hosi nia órgaun no servisu sira, tuir planu distribuisaun ne’ebé prevee ona iha númeru anteriór;

i) Autoriza no rejista transferénsia mobiliáriu, mákina no ekipamentu ruma entre departamentu no servisu sira Autoridade Munisipál respetiva nian;

j) Garante konservasaun no reparasaun ba veíkulu, mákina no ekipamentu Estadu nian ne’ebé atribui ba Autoridade Munisipál respetiva, hodi propoin, bainhira de’it iha justifikasaun, terseirizasaun ba servisu sira-ne’e;

k) Rejista no fó-hatene ba respetivu Prezidente Autoridade Munisipál nian kona-ba estragu no avaria sira ne’ebé akontese iha veíkulu Estadu nian, mákina no ekipamentu ruma ne’ebé iha ligasaun ba Autoridade Munisipál no identifika funsionáriu ka ajente Administrasaun Públika nian ne’ebé responsável ba ida-ne’e;

l) Simu no rejista pedidu sira kona-ba kombustível no materiál konsumível sira ne’ebé aprezenta hosi órgaun no servisu sira Autoridade Munisipál respetiva nian;

m) Rekuza atu entrega voucher kombustível no materiál konsumível bainhira de’it órgaun no servisu munisípiu sira ultrapasa limite konsumu ne’ebé estabelese ba sira hosi respetivu Prezidente Autoridade Munisipál;

n) Entrega no rejista voucher kombustível no materiál konsumíveis ba órgaun ka servisu rekerente, bainhira de’it laiha baze atu rekuza ida-ne’e;

o) Fornese veíkulu, mákina, ekipamentu no materiál ne’ebé nesesáriu ba organizasaun no realizasaun serimónia ofisiál, selebrasaun no aktu ofisiál ne’ebé nia organizasaun no hala’o responsabilidade Autoridade Munisipál respetiva;

p) Monta, garante operabilidade, garante funsionamentu loloos no prosede ho desmantelamentu ba palku sira, tribuna sira, sistema iluminasaun nian, estrutura apoiu son no imajen nian ka kualkér estrutura seluk ne’ebé nesesáriu ba organizasaun no realizasaun serimónia ofisiál sira, selebrasaun no aktu ofisiál sira-ne’ebé nia organizasaun no realizasaun sai responsabilidade hosi Autor Munisipál respetivu;

q) Jere armazén no kintál veíkulu, mákina no ekipamentu nian husi Autoridade Munisipál respetiva;

r) Garante konservasaun di’ak ba sasán ruma ne’ebé eziste iha armazén no kintál veíkulu, mákina ka ekipamentu sira Autoridade Munisipál respetiva nian;

s) Prepara no mantein rejistu inventáriu atualizadu kona-ba sasán sira ne’ebé rai hosi Autoridade Munisipál respetiva no propoin ba Prezidente Autoridade akizisaun sasán sira ho hanoin atu substitui sira-ne’ebé uza ona;

t) Prepara no submete ba Prezidente Autoridade Munisipál respetivu relatóriu sumáriu kona-ba movimentu armajen mensál, trimestrál no anuál no situasaun estoke nian;

u) Kolabora ho Servisu Finansa Munisipál iha preparasaun proposta Planu Fornesimentu Munisipál;

v) Hala’o kna’ar sira seluk iha ámbitu jestaun lojístika nian ne’ebé superiór sira fó ba nia no ne’ebé la’ós responsabilidade hosi órgaun ka servisu seluk hosi Autoridade Munisipál respetiva.

Artigu 15.º

Departamentu sira

1. Servisu Patrimóniu no Lojístika Munisipál nian kompostu husi:

a) Departamentu Patrimóniu ida, responsável atu hala’o aktu sira no prosesa prosesu administrativu sira ne’ebé presiza atu hala’o knaar sira ne’ebé prevee iha § 1 hosi artigu anteriór;

b) Departamentu Lojístika ida, responsável atu hala’o aktu sira no prosesa prosedimentu administrativu sira ne’ebé presiza atu hala’o knaar sira ne’ebé prevee iha númeru 2 hosi artigu anteriór.

Departamentu sira ne’ebé prevee ona iha númeru anteriór mak hanesan xefia hosi Xefe Departamentu sira, ne’ebé nomeia tuir rejime komisaun servisu nian, tuir termu Dekretu-Lei No. 3/2016, loron 16 fulan-marsu.

Tabela 12 : Forsa Traballu Servisu Munisipal Patrimonio no Logistika