Hatutan.com, (12 Janeiru 2022), Díli—Tribunál Distritál Díli (TDD), Kuarta (12/01/2022), kontinua hala’o julgamentu ba krime partisipasaun ekonomia no negósiu ne’ebé deskonfia involve hosi eis-Ministru Administrasaun Estatál no Ordenamentu Territoriál (MAE) iha tinan 2010, arguidu Arcângelo de Jesus Gouveia Leite ho funsionáriu públiku na’in-haat hanesan arguida Rosa Amaral Vong, arguidu Angelo Urbano Fernandes, Agostinho Ximenes ho Domingos Monteiro.

Kazu ne’e mós Ministériu Públiku notifika Diretora empreza Nautetu Unipesoal Lda, Maria de Fátima Imaculada Correia Costa Bello no Diretór empreza Lifau Indah Unipesoal Lda, Fernando, hanesan arguida ho arguidu relasiona ho konstrusaun edifísiu foun Câmara Munisípiu Baucau no Oé-Cusse iha tinan 2010 ne’ebé fó prejuizu ba Estadu ho montante global ba projetu rua $147,024.44.

Iha julgamentu kontinuasaun ne’e, eis Diretór Finansas MAE, arguidu Angelo Urbano Fernandes deklara nia parte laiha koñesimentu kona-bá regra aprovizionamentu, tanba ne’e projetu primeiru ne’ebé implementa iha tempu ne’ebá, maske nia parte rekoñese asina pedidu adisionál 10% ba projetu konstrusaun edifísiu foun Câmara Munisípiu Baucau.

“Tuir ha’u nia koñesimentu adisionál 10% ne’e téknikamente depende ba servisu iha terrenu,” arguidu Angelo Urbano Fernandes hateten perante audiénsia julgamentu.

Antes ne’e arguidu rekoñese nia parte asina pedidu pagamentu primeiru bazeia ba relatóriu hosi Ministériu Obras Publika (MOP) ne’ebé hetan ona aprovasaun, tanba laiha razaun atu labele asina pedidu pagamentu enkuantu MOP aprova ona, maibé depois asina pedidu pagamentu submete dokumentu ba Ministériu Finansa (MF) maka halo pagamentu direta ho empreza, tanba MF maka loke tenderizasaun inklui halo pagamentu.

Ministériu Públiku (MP) akuza arguidu Arcângelo de Jesus Gouveia Leite, arguida Rosa Amaral Vong, Angelo Urbano Fernandes ba krime rua; partisipasaun ekonomia no negósiu no arguida Maria de Fátima Imaculada Correia Costa Bello no Fernando Mak ba krime Burla Agravadu, arguidu Agostinho Ximenes, Domingos Monteiro ba krime Administrasaun Danoza ne’ebé previstu iha artigu 299, 267, 274 hosi kódigu penál Timor-Leste.

Audiénsia julgamentu ne’e prezide hosi juiz koletiva Antónia Carmona, Ercilia de Jesus, Albertina Neves no MP reprezenta hosi Prokuradora Lídia Soares, arguidu sira hetan asisténsia legál hosi Defensór Públiku ida no Advogada Privada ida.

Envia um comentário

Seu endereço de e-mail não será publicado. Os campos obrigatórios estão marcados com *

*

© 2020 Ministério da Administração Estatal