𝐋𝐀𝐍𝐒𝐀𝐌𝐄𝐍𝐓𝐔 𝐃𝐈𝐒𝐓𝐑𝐈𝐁𝐔𝐈𝐒𝐀𝐔𝐍 𝐀𝐈-𝐎𝐀𝐍 𝐍𝐎 𝐏𝐑𝐎𝐆𝐑𝐀𝐌𝐀 𝐑𝐄𝐅𝐋𝐎𝐑𝐄𝐒𝐓𝐀𝐒𝐀𝐔𝐍 𝐓𝐈𝐍𝐀𝐍 𝟐𝟎𝟐𝟔 𝐈𝐇𝐀 𝐌𝐄𝐓𝐈𝐍𝐀𝐑𝐔

𝐌𝐞𝐭𝐢𝐧𝐚𝐫𝐮, 𝟏𝟐 𝐉𝐚𝐧𝐞𝐢𝐫𝐮 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos, hamutuk ho Sua Excelénsia Sekretáriu Estadu Florestas, Sr. Fernandino Vieira da Costa, Sekretáriu Estadu Terras no Propriedade, Sr. Jaime Xaveir Lopes, no Diretor Jeral Florestas, Sr. Hermenegildo de A. Almeida Granadeiro no Administrador Postu Administrativu Metinaru halo lansamentu distribuisaun ai-oan no programa reflorestasaun tinan 2026 iha Suku Wenunuk, Postu Administrativu Metinaru, Munisípiu Díli, iha Segunda-Feira ne’e.

Iha diskursu, PAM Díli hateten katak, reflorestasaun hanesan atividade estratéjika ida atu asegura ambiente ida ne’ebé saudavel ba komunidade.

“Ha’u espera katak espiritu reflorestasaun sei kontinua la’o ba oin nafatin, tanba reflorestasaun mak atividade importante ida ne’ebé bele asegura ita nia ambiente ida ne’ebé saudavel, liu-liu ba ar (Óxigenio) ne’ebé ita simu loro-loron. Iha komunidade balun sei sunu rai iha tempu bailoron, ho nune’e ha’u husu ba autoridade sira iha ne’e, liu-liu Polísia Florestal no OPS sira, atu servisu hamutuk hodi proteje ita nia ai-horis no ambiente,” hateten Prezidente PAM Díli.

Nia mos agradese ba Sekretáriu Estadu Florestas no nia ekipa ne’ebé iha inisiativa atu kontinua hala’o programa reflorestasaun, hanesan ne’ebé antes halo ona iha área Mahoka, no agora mai fali iha Metinaru hanesan pasu importante ida atu refloresta fali sidade Díli.

Iha okaziun ne’e, Sua Excelénsia Sekretáriu Estadu Florestas, Sr. Fernandino Vieira da Costa, iha nia diskursu hateten katak lansamentu distribuisaun ai-oan no programa reflorestasaun ne’e sai hanesan parte husi kompromisu polítika IX Governu konstitusionál nian, oinsa atu proteje no konserva floresta násional.

“Ohin ita mai hamutuk hodi halo lansamentu distribuisaun ai-oan no mós programa reflorestasaun, ne’ebé sai hanesan kompromisu polítika IX Governu Konstitusionál, atu kontinua promove reflorestasaun iha área kritiku sira, no proteje ita nia floresta ba sustentabilidade ita nia rai Timor-Leste. Tuir planu sei kontinua hala’o programa reflorestasaun no sei kontinua kuda ai-oan iha Beduku ho área hamutuk 100 hektares hodi refloresta fali korredór Díli,” Sekretáriu Estadu Florestas esplika.

Enkuantu Ai-Oan ne’ebé kuda iha área Suku Wenunuk, Postu Administrativu Metinaru hamutuk hektares 4 ho total ai-oan 4.444 pes, ne’ebé kuda ho simbolikamente. Tipu ai-oan ne’ebé kuda inklui Aikási, Bambu, Ai-Kakeu, Akásia, Paramba, Aina, Aiata Nona, Kulu, Gaharu no Mahoni.

Fonte : (𝐌é𝐝𝐢𝐚 𝐆𝐚𝐛.𝐏𝐀𝐌)