𝐖𝐅𝐏, 𝐈𝐋𝐎 𝐇𝐎 𝐔𝐍𝐈𝐂𝐄𝐅 𝐇𝐀𝐋𝐀’𝐎 𝐄𝐍𝐊𝐎𝐍𝐓𝐑𝐔 𝐇𝐎 𝐀𝐌𝐃 𝐊𝐎𝐍𝐀-𝐁Á 𝐏𝐑𝐎𝐉𝐄𝐓𝐔 𝐒𝐎𝐒𝐈𝐀𝐋𝐈𝐙𝐀𝐒𝐀𝐔𝐍 𝐍𝐎 𝐅𝐎𝐑𝐓𝐈𝐅𝐈𝐊𝐀𝐒𝐀𝐔𝐍 𝐅Ó𝐒 𝐈𝐇𝐀 𝐌𝐔𝐍𝐈𝐒Í𝐏𝐈𝐔 𝐃Í𝐋𝐈.

𝐃í𝐥𝐢, 𝟐9 𝐉𝐚𝐧𝐞𝐢𝐫𝐮 𝟐𝟎𝟐𝟔

World Food Programme (WFP), hamutuk ho UNICEF no ILO, hala’o reuniaun ho Autoridade Munisípiu Díli liu husi Sekretáriu Munisipál nain tolu no akompaňa ho Diretores Servisus Munisipais sira hodi hala’o enkontru kona-bá implementasaun projetu “Haforsa Inkluzaun Sosiál no Nutrisaun iha Timor-Leste”. Enkontru refere hala’o iha salaun A AMD Kinta-Feira ne’e.

WFP informa katak projetu ida-ne’e sei implementa durante tinan haat to’o Junhu 2028, ho objetivu atu hasa’e rezultadu nútrisaun, saúde no proteksaun sosial ba grupu vulnerável, inklui feto isin-rua, labarik sira ne’ebé seidauk too tinan lima, labarik eskola no traballadór informál sira.

Projetu “Haforsa Inkluzaun Sosiál no Nútrisaun iha Timor-Leste” inklui mós implementasaun programa Home-Grown School Feeding, ne’ebé kompleta ho intervensaun iha nútrisaun, saúde, bee no saneamentu, protesaun sosiál, inklui fortifikasaun fós, hodi apoia labarik eskola liuhusi Programa Nasiónal Merenda Eskolár.

Partisipante sira ne’ebé mak partisipa iha enkontru ne’e mak, Sekretáriu Munisípál 1,2,3, Diretor sira husi setór relevante hanesan Edukasaun, Finansas, Seguransa Ai-han, Saúde, Lojístika, Dezenvolvimentu Rurál, SMASA, Servisu Dezentralizadu ba Asuntu Munisípiu, no koordenadór INSS.

WFP espera kooperasaun entre Governu Timor-Leste, liu husi Autoridade Munsípiu Díli, sei iha koordenasaun ne’ebé diak, no bele fó kontribuisaun ba susesu implementasaun projetu no hadia bem-estar nutrisaun labarik no komunidade sira iha Timor-Leste liu-liu iha Munisípiu Díli.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)