𝐕𝐈𝐙𝐈𝐓𝐀 𝐊𝐎𝐑𝐓𝐄𝐙𝐈𝐀 𝐄𝐌𝐁𝐀𝐈𝐗𝐀𝐃𝐎𝐑 𝐓𝐀𝐈𝐋Á𝐍𝐃𝐈𝐀 𝐌𝐀𝐈 𝐀𝐌𝐃

𝐃í𝐥𝐢 𝟎𝟒 𝐌𝐚𝐫𝐬𝐮 𝟐𝟎𝟐𝟔

Prezidente Autoridade Munisipiu (PAM) Dili hetan vizita kortejia husi Embaixador Thailandia S.E. Atipat Rojanapaibulya iha edifisiu AMD.

Objetivu husi vizita ne’e atu hametin relasaun amizade entre guvernu Thailandia liuhusi Embaixada Thailandia iha Timor-Leste no Munisipal Dili.

Aleinde ne’e, Embaixada Thailandia mos planea ona atu expande tan sira nia edifisiu Embaixada nian inkliu mos konstrui tan edifisiu foun iha areador Embaixada Thailandia nian.

Ho nune’e, Embaixador Thailandia S.E. Atipat Rojanapaibulya hakarak hasoru malu ho PAM Dili hodi rona no hetan sujestaun sira kona-ba extensaun no konstruisaun refere.

PAM Díli, Sr. Francisco dos Santos sinti orgullu tanba Embaixador Thailandia disponivel hodi vizita AMD. Tuir PAM, kon-ba konstrusaun no expansaun edifisiu nian, partensia ba Obras Publiku Nasional nomos hala’o konsultasaun ho Autoridade Nasional Lisensia Ambiental (ANLA) molok hala’o konstrusaun, AMD so hare ba kestaun lixu bainhira halo konstrusaun.

Tanba ne’e, nia husu ba Embaixador atu fo atensaun ba iha prosesu konstrusaun tanba material sira ne’ebe transporta durante konstrusaun bele fo impaktu, liuliu kareta sira tula material tama no sai area konstrusaun.

Embaixador Thailandia sei tau atensaun kona-ba jestaun lixu nian no sei koordenasaun diak ho AMD kona-ba kestaun lixu nian. Entertantu, Embaixador mos informa katak governu Thailandia oferese kapasitasaun ba rekursu umanu ba iha Timor-Leste.

Tan ne’e, AMD persiza identifika nesesidade sira ne’ebe presija no informa ba Embaixada Thailandia liuhusi Ministeriu Negosiu Estranjeiru no Koperasaun TL (MNEC) foin MNEC hatutan ba sira.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)