PAM-DILI SEI APLIKA SELU TASA BA VIZITANTE SIRA BAINHIRA VIZITA FATIN TURIZMU

Dili, 27 Marsu 2026

Prezidenti Autoridade Munisípiu Díli (PAM-Díli) iha planu atu aplika selu tasa ba vizitante sira ne’ebé ba vizita fatin turizmu iha área Munisípiu Díli, ho objetivu atu suporta manutensaun fatin turizmu sira no promove dezenvolvimentu setór turizmu iha kapitál nasaun nian.

Prezidenti Autoridade Munisípiu Díli, Francisco do Santos hateten, planu ne’e sai nu’udar esforsu atu organiza no hadia jestaun fatin turizmu sira, ne’ebé durante ne’e akontese aumentu vizitante lokal no mos vizitante husi rai li’ur.

“Ita sei aplika tasa ba vizitante sira ne’ebé mak ba halo vizita ba fatin turista sira, tanba ne’e ita sei tau makina ida hanesan iha aroportu nian nian ne’e, atu nune’e bain hira vizitante sira atu tama maizumenus kontribui netik quertel hanesan ne’e foin tama.

Medida ne’e atu asegura katak fatin turizmu sira iha Díli bele hetan jestaun ne’ebé di’ak liutan. Osan husi taxa ne’e sei uza atu suporta limpeza, seguransa no melhoria fasilidade sira iha fatin turizmu,” hateten Prezidenti Autoridade Munisípiu Díli, Francisco iha Cristu Rei, Díli.

PAM-Díli konsidera katak presiza iha mekanizmu espesífiku atu asegura fatin turizmu sira bele hetan manutensaun no atensaun ne’ebé adekuadu. Tanba ne’e aplikasaun taxa ida-ne’e bele sai solusaun ida atu ajuda responde ba nesesidade sira-ne’e.

“Governu agora sei hadia hela fatin turismu sira hanesan Cristo Rei, tanba ne’e bainhira di’ak ona mak ita sei aplika tasa ba vizitante sira, atu nune’e osan sira-ne’e ita uza hodi hadia fila fali fatin sira-ne’e,” nia esplika.

PAM-Díli mos esplika katak mekanizmu implementasaun selu tasa ne’e sei organiza ho sistema espesífiku atu fasilita vizitante sira bainhira tama ba fatin turizmu, atu garante prosesu rekolla taxa ne’e bele lao ho transparénsia no jestaun ne’ebé sustentável, nune’e bele kontinua atrai vizitante lokal no internasionál sira iha futuru.

Aleinde ne’e, PAM-Díli hateten katak medida ida-ne’e mós iha objetivu atu promove turizmu sustentável, ne’ebé bele proteje no preserva poténsia turizmu iha Díli ba tempu naruk.

PAM-Díli espera katak politika selu tasa ba vizitante sira bele sai fonte rendimentu ida atu ajuda dezenvolve setór turizmu iha Díli, nomós kontribui ba esforsu atu promove imajen Díli nu’udar destinasaun turizmu iha Timor-Leste.

Iha parte seluk, vizitante Aljira Miranda fó hanoin katak aplikasaun selu taxa bele sai medida ida di’ak, maibé presiza iha garantia katak osan ne’ebé rekolla husi taxa ne’e uza ho transparente no realmente atu hadi’a kondisaun fatin turizmu sira.

“Se taxa ne’e uza atu hadia limpeza, seguransa no fasilidade sira iha fatin turizmu, ami hanoin di’ak, tanba vizitante sira mós presiza kondisaun ne’ebé di’ak bainhira ba vizita,” hateten vizitante Aljira.

Nia hateten katak sira la iha problema atu selu taxa bainhira vizita fatin turizmu, karik medida ida-ne’e bele ajuda melhora fasilidade ba vizitante sira.Nia dehan katak governu presiza asegura katak implementasaun medida ne’e la bele fó todan liu ba vizitante sira.

Fontes : https://thediliweekly.com