PAM DILI ABERTURA SOSIALIZASAUN PROSEDIMENTU IMPLEMENTASAUN PNDS

𝐃𝐢𝐥𝐢, 𝟏𝟓 𝐀𝐛𝐫𝐢𝐥 𝟐𝟎𝟐𝟔

Prezidente Autoridade Munisípiu (PAM) Dili , Sr. Francisco dos Santos, ofisialmente loke atividade sosializasaun kona-ba prosedimentu implementasaun Programa Nasional Dezenvolvimentu Suku (PNDS) iha Munisípiu Dili, inklui mos orientasaun husi Sekretariadu Tékniku (ST) PNDS Nasionál. Aktividade ne’e realiza iha Salaun B, Autoridade Munisípiu Dili.

Sosializasaun ne’e iha objetivu atu fahe informasaun kle’an kona-ba prosedimentu siklu implementasaun PNDS, inklui menu indikativu no orsamentu, ba diretór liña setoriál sira, lideransa komunitária, organizasaun naun-governamentál (ONG), no estrutura PNDS iha nivel suku. Ho atividade ida ne’e, espera katak parte hotu bele kompriende didiak mekanizmu PNDS no hafasil liu tan koordenasaun entre setór sira iha prosesu implementasaun programa iha terenu.

Iha nia intervensaun, PAM Francisco dos Santos subliña katak PNDS hanesan programa estratéjiku husi governu sentral ne’ebé ho objetivu atu hakbesik governu ba komunidade iha baze. Nia hatete katak, iha tempu uluk, desizaun barak foti iha nivel sentral, maibé liu husi PNDS, governu fó oportunidade ba komunidade atu sai protagonista iha identifikasaun no definisaun prioridade dezenvolvimentu.

“Komunidade iha baze mak hatene di’ak liu sira nia preokupasaun lor-loron, hanesan problema bee moos, estrada aat, no valeta ne’ebé la di’ak. Tanba ne’e, liu husi PNDS, ita fó espasu ba lideransa lokal sira atu identifika no determina prioridade sira tuir realidade iha suku ida-idak,” hatete PAM.

PAM mos esplika katak programa PNDS uluk implementa ho natureza multi-anual, ne’ebé konsidera efisiente no sustenável. Maibé, iha períodu 2024 to’o 2025, programa ne’e hetan mudansa signifikativu ba sistema anual. Nia hatete katak mudansa ida ne’e implika katak projetu hotu-hotu ne’ebé implementa iha baze tenke remata antes 31 Dezembru kada tinan.

“Se projetu la konsege remata tuir prazu ne’ebé determina, orsamentu ne’ebé aloka ba PNDS sei fila fali ba kofre Estadu. Tanba ne’e, hau bolu ba ita hotu atu fó atensaun másimu no aumenta responsabilidade durante implementasaun projetu iha terenu,” akresenta PAM ho enfase.

Atividade ne’e hetan partisipasaun husi diresaun PNDS ho nia estrutura tomak, inklui mos Administradór Postu Administrativu (APA) nain lima, diretór munisipál sira, tékniku PNDS, no autoridade lokal sira.

Sosializasaun ida ne’e konsidera importante atu garante implementasaun PNDS ne’ebé efikaz, transparente no responde diretamente ba nesesidade komunidade iha Munisípiu Dili.

Fontes : (𝑴é𝒅𝒊𝒂 𝑮𝒂𝒃. 𝑷𝑨𝑴)