FASILIDADE SINTINA PÚBLIKU IHA DILI HAHU OPERA HO TAXA US $0,25

𝐃𝐢𝐥𝐢, 𝟏𝟔 𝐀𝐛𝐫𝐢𝐥 𝟐𝟎𝟐𝟔

Prezidente Autoridade Munisípiu ( PAM) Dili, Sr. Francisco dos Santos, hala’o enkontru ho Diretór Servisu Munisipal Água no Saneamentu Ambiental (SMASA), Sr. Domingos Godinho, no ekipa kobransa sintina públiku, hodi diskute kona-ba melloramentu jestaun no prestasaun servisu iha fatin sintina públiku sira iha Munisípiu Dili.

Iha enkontru ne’e, PAM hato’o katak iha etapa primeiru, sintina públiku lima mak sei opera, mak hanesan iha B.J. Habibie, 5 de Maio, Colmera, JP, no iha área Timor Lodge nia oin. Medida ida ne’e atu asegura fasilidade sanitária ne’ebé disponivel ba komunidade ho di’ak no organiza.

PAM mos husu ba ekipa sira atu hala’o servisu ho responsabilidade, disiplina no transparénsia, liu-liu iha prosesu kobransa. Atu garante sustentabilidade no manutensaun fasilidade sira, utilizadór hotu-hotu ne’ebé uza sintina públiku sei selu kontribuisaun ho presu US$0,25 kada utilizasaun.

Diretór SMASA, Sr. Domingos Godinho, hatete katak ekipa sei kontinua halo monitorizasaun no koordenasaun ho di’ak atu asegura servisu ne’e lao tuir padraun ne’ebé determina ona, no responde ba nesesidade komunidade nian.

Fontes : (𝐌𝐞𝐝𝐢𝐚 𝐠𝐚𝐛. 𝐏𝐀𝐌)