PAM DILI PARTISIPA IHA ENKONTRU KOORDENASAUN SERVISU PROGRAMA SAÚDE MENTAL NE’EBÉ REALIZA IHA SALAUN SAUDE MUNISIPIU DÍLI

𝐃𝐢𝐥𝐢 𝟏𝟒 𝐌𝐚𝐢𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos partisipa iha Enkontru Koordenasaun Servisu Programa Saúde Mental ne’ebé realiza iha Salaun Saude Munisipiu Díli.

Partisipasaun ida ne’e hanesan parte husi kompromisu Autoridade Munisípiu Dili atu fortalese koordenasaun servisu saúde mental no hadi’a atendimentu ba komunidade.

Iha enkontru ne’e, partisípante sira diskute kona-ba estratéjia, desafiu no medida importante sira atu garante servisu saúde mental ne’ebé di’ak liu ba sidadaun sira iha Munisipiu Dili.

Diretor Saude Servisu Munisípal Díli Sr. Mateus Pinto hateten moras mental sai preokupasaun bo’ot iha Munisípiu Díli, tamba antes ne’e iha ona akontesimentu ne’ebé envolve ema ho moras mental koko halo agresaun fíziku ba komunidade sira too ema ida hakotu iis iha Ospitál Nasionál Guidu valadares (HNGV). Ho akontesimentu ida ne’e servisu saúde Munísipiu Díli apresija servisu makas oinsa buka solusaun ba problema hirak ne’ebé akontese ona, atu iha futuru bele akontese tan no prersija kria mos kondisaun di’ak no halo tratamentu di’ak ba ema moras mental sira ho dignu.

Iha Fatin hanesan Diretor Pradet, Sr. Manuel dos Santos mos hato’o nia preokupasaun servisu ba PAM Díli relasiona ho kondisaun servisu ne’ebe dadaun ne’e Pradet hasoru, tamba servisu rehabilitasaun ba fatin Moras mental nian la iha espasu ne’ebé permite ba sira, tamba ne’e nia husu ba PAM Díli hodi bele buka solusaun hamutuk ba preokupasaun sira ne’ebé pradet infrenta durante ne’e.

Hatan ba preokupasaun sira ne’e, Prezidente Autoridade Munisípiu Díli, Sr. Francisco dos Santos hatete katak, ho preokupasau sira ne’e presija servisu hamutuk liu-liu oinsa atu tau atensaun makaas ba ema moras mental sira iha munisipiu dili, no oinsa atu tau konsiderasaun ba sira nu’udar ema humanu hodi fo atendimentu ne’ebé diak hodi tratamentu aimoruk ba sira ho diak liu hodi sir abele rekupera husi kondisaun sira ne’ebé iha.

Ho sorumutu ida ne’e, espera katak servisu saúde mental iha Munisípiu Dili bele sai di’ak liu no responde efetivamente ba nesesidade komunidade nian.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)