𝐏𝐑𝐄𝐙𝐈𝐃𝐄𝐍𝐓𝐄 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃𝐈𝐋𝐈 𝐋𝐈𝐃𝐄𝐑𝐀 𝐒𝐄𝐑𝐈𝐌Ó𝐍𝐈𝐀 𝐈𝐍𝐒𝐀𝐑 𝐁𝐀𝐍𝐃𝐄𝐈𝐑𝐀 𝐍𝐀𝐒𝐈𝐎𝐍𝐀𝐋 𝐍𝐄’𝐄𝐁𝐄 𝐇𝐀𝐋𝐀’𝐎 𝐈𝐇𝐀 𝐑𝐄𝐒𝐈𝐍𝐓𝐔 𝐀𝐌𝐃

𝐃𝐢𝐥𝐢, 𝟏 𝐉𝐮ñ𝐮 𝟐𝟎𝟐𝟔

Prezidente Autoridade Munisípiu Dili (PAM Dili), Sr. Francisco dos Santos, lidera Serimónia Insar Bandeira ne’ebé hala’o iha resintu Autoridade Munisípiu Dili (AMD). Serimónia ne’e hahú ho insar Bandeira Nasional no kanta Hino Nasional “Pátria”.

Serimónia insar bandeira ne’e realiza regularmente iha loron dahuluk kada fulan ho objetivu atu hametin valor patriotizmu, disiplina servisu no respeitu ba símbolu Estadu nian.

Iha nia intervensaun, PAM Dili hato’o apresiasaun no parabéns ba ekipa insar bandeira no ekipa koru ne’ebé hala’o serimónia ho di’ak. Nia mos subliña katak durante períodu 2024 to’o 2026, AMD presija halo mudansa balu iha estrutura organizasional hodi kria ambiente servisu ida ne’ebé efetivu, produtivu no favorável ba dezenvolvimentu kapasidade funsionáriu sira, atu bele hala’o sira-nia knaar ho profesionalizmu no responsabilidade.

Iha oportunidade ne’e, PAM Dili husu mós ba diretor sira atu realiza reuniaun regular ho funsionáriu sira, pelumenus fulan ida dala ida, hodi halo avaliasaun ba servisu, identifika dezafiu sira no buka solusaun hamutuk atu hasa’e produtividade no kualidade servisu.

Serimónia Insar Bandeira ne’e hetan partisipasaun husi funsionáriu tomak AMD, inklui SECAM I, SECAM II no SECAM III, diretor munisipál sira, no Administrador Postu Administrativu (APA) nain lima husi Postu Administrativu sira iha Munisípiu Dili.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)