𝐃𝐢𝐥𝐢, 𝟏𝟓 𝐉𝐮ñ𝐮 𝟐𝟎𝟐𝟔

Autoridade Munisípiu Dili (AMD), liuhosi ekipa esgotu, kontinua hala’o atividade limpeza regulár iha área Dili laran, atu asegura ambiente ne’ebé mós no saudavel ba komunidade.

Atividade limpeza ne’e fokus liu ba limpeza mota laran, drenajen no fatin esgotu sira ne’ebé durante tempu balun akumula lixu no sedimentu sira.

Objetivu husi atividade ida ne’e maka atu hasai lixu sira ne’ebé namkari iha mota laran no drenajen sira, hodi prevene intupimentu bee no minimiza risku inundasaun bainhira tempu udan.

Ohin, ekipa esgotu hala’o servisu limpeza iha área Aitarak Laran, Kuluhun, Bidaun Santa Ana, Vera Cruz, Aituri Laran no fatin sira seluk hodi kobre área dili laran, no Servisu ne’e hala’o ho maneira regulár tuir planu operasionál ne’ebé prepara ona hodi garante limpeza no manutensaun infraestrutura saneamentu iha munisípiu dili.

Autoridade Munisípiu Dili husu ba sidadaun hotu-hotu atu hamutuk kuida ambiente no labele soe lixu arbiru iha mota, valeta no drenajen sira tanba bele sai hanesan kauza prinsipál ba intupimentu no inundasaun iha komunidade.

Ho kolaborasaun entre AMD no komunidade, espera katak kondisaun limpeza no saneamentu iha Munisípiu Dili bele di’ak liután no kontribui ba ambiente ida ne’ebé saudavel, seguru no konfortável ba ema hotu.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)