𝐃í𝐥𝐢 𝟏𝟓 𝐉𝐮ñ𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, hala’o enkontru ho Diretór-Jerál Ministériu Komérsiu e Indústria (MCI), Sr. Elias de Jesus Fátima ho nia ekipa, hodi diskute kona-ba manutensaun ba merkadu Taibesi no Manleu no mos planu konstrusaun ba Merkadu foun rua refere iha tinan oin mai.

Enkontru ne’e hanesan enkontru kontinuasaun husi PAM Díli ho S.E Ministru Komersiu no Industria Filipos Nino Pereira iha tinan kotuk, ne’ebe antes ne’e realiza ona, atu fortalese koordenasaun servisu entre Autoridade Munisípiu Dili no MCI, nune’e bele asegura projetu konstrusaun merkadu sira ne’e lao ho di’ak, tuir nesesidade komunidade no bele fó benefísiu ba vendedór sira .

PAM Dili hateten liu husi enkontru ne’e, Autotidade Munisipiu Dili bele hatene progresu estudu viabilidade ne’ebe durante ne’e lao ona no mos kona ba planu konstrusaun ba merkadu rua refere.

“Enkontru ohin importante tebes atu hodi hare liu kona-ba merkadu Taibesi no Manleuana ne’ebé antes ne’e hau rasik mai hasoru ona S.E Ministru MCI hodi koalia oinsa atu preve osan hodi halo rehabilitasaun ba merkadu Taibesi no Manleuana, tamba ne’e ohin hau mai fila fali atu hodi hare nia prosesu ba manutensaun ba merkadu rua ne’e to ona iha ne’ebé. Hanesan ita akompaña katak Merkadu rua ne’e ho kondisaun grave tebes, tamba ne’e ami husi AMD buka nafatin meius hodi limpeza, maibe ba konstrusaun no manutensaun ne’e rasik dadauk ne’e ami seidauk preve orsamentu tamba ne’e iha tinan kotuk hau mai hasoru S.E. Ministru hodi koalia kona-ba prosesu konstrusaun merkadu rua ne’e rasik, no iha tempu ne’eba S.E. Ministru hateten katak prosesu ne’e rasik tama ona iha faze estudu viabilidade no fulan Marsu tinan 2026 foin lalais ne’e ita konklui ona, no liu husi biban ida ne’e hakarak husu atu AMD ho MCI atu nafatin servisu hamutuk hodi implementa programa ne’e”. Dehan PAM.

Hatan ba preokupasaun hirak ne’e , Diretór-Jerál Ministeriu Komérsiu no Industria, Sr. Elias de Jesus Fátima katak, Ministériu Komersiu no Industria liu husi Nonu Governu Konstitusional la aloka osan ba halo manutensaun maibe aloka deit orsamentu ba konstrusaun foun merkadu rua refere .

“ kompromisu MCI, kontinua servisu hamutuk ho Autoridade Munisípiu Dili no entidade relevante sira atu garante projetu konstrusaun Merkadu Taibesi no Manleuana bele realiza ho efisiente no responde ba nesesidade komunidade, no nafatin husu ba ekipa tékniku sira bainhira iha aprejentasaun husi kompañia sira bele mos envolve AMD”.

Liu husi enkontru ida ne’e, espera katak prosesu preparasaun no implementasaun projetu konstrusaun merkadu rua ne’e bele avansa lalais, atu fó fatin komérsiu ne’ebé di’ak liu ba vendedór sira no kontribui ba kresimentu ekonomia iha Munisípiu Dili.