Ho sentimentu triste no laran moras, Prezidente Autoridade Munisípiu Dili, Sr. Francisco dos Santos, hamutuk ho funsionáriu sira hotu Autoridade Munisípiu Dili (AMD), hato’o sentidu kondolénsia kle’an no solidariedade ba família enlutada, família boot FRETILIN no povu Timor-Leste tomak kona-ba falecimentu Sua Excelénsia Francisco Guterres “Lu-Olo”.

Timor-Leste lakon patriota ida, líder ida no estadista ida ne’ebé durante nia moris dedika-an ba luta libertasaun nasionál, hametin unidade nasionál, dame no dezenvolvimentu nasaun nian. Nia servisu, lideransa no sakrifísiu ba povu no nasaun sei moris nafatin iha memória no konsiénsia povu Timor-Leste.

Nu’udar eis-Prezidente Repúblika Demokrátika Timor-Leste, eis-Prezidente Parlamentu Nasional no líder histó¬riku ida, Sua Excelénsia Francisco Guterres “Lú-Olo” husik hela legadu importante ida ba ukun-an, soberania no konsolidasaun demokrasia iha Timor-Leste.

Iha momentu lutu ida-ne’e, Autoridade Munisípiu Dili hamutuk ho funsionáriu sira hotu hato’o respeitu aas no omenajen ikus ba líder ida-ne’ebé dedika-an tomak ba povu no nasaun.

Maromak fó deskansa eterna ba matebian, no fó forsa, hakmatek no kbiit ba família tomak atu hasoru momentu difísil ida-ne’e.

𝐇𝐚𝐤𝐦𝐚𝐭𝐞𝐤 𝐢𝐡𝐚 𝐃𝐚𝐦𝐞 𝐄𝐭𝐞𝐫𝐧𝐚, 𝐒𝐚𝐮𝐝𝐨𝐳𝐮 𝐂𝐚𝐦𝐚𝐫𝐚𝐝𝐚 𝐅𝐫𝐚𝐧𝐜𝐢𝐬𝐜𝐨 𝐆𝐮𝐭𝐞𝐫𝐫𝐞𝐬 “𝐋ú-𝐎𝐥𝐨”.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)