𝐃í𝐥𝐢, 𝟑𝟎 𝐉𝐮ñ𝐮 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos, ohin simu ekipa Pacific Consultants Co., Ltd. Husi nasaun Japaun nian mai iha Gabinete PAM Díli hodi hala’o enkontru kona-ba levantamentu (survey) ba implementasaun projetu Smart City iha Timor-Leste, ne’ebé suporta husi Ministry of Land, Infrastructura, Transport and Tourism (MLIT) husi Governu Japan nian.

Enkontru ne’e partisipa husi Chief Consultant, Urban Planning and Project Management Department Takuti Mikuniya, Chief Project Manager, Urban Planning and Project Management Department Masato Akashi, Urban Planning and Project Management Department Natsuki Takayama, asesor ba PAM Dili, Nene de Almeida, no Asesor ba Servisu no operasaun Autoridade Munisípiu Díli, Sebastián Guterres.

Iha enkontru ne’e, ekipa Pacific Consultants esplika katak survey ne’e nu’udar etapa dahuluk husi inisiativa Smart City husi Governu Japaun, ne’ebé nia objetivu mak atu identifika kondisaun no nesesidade iha Munisípiu Dili atu bele implementa solusaun teknolójika ba área hanesan planeamentu urbana, sistema transporte, jestaun tráfiku, jestaun lixu, drenajen, mitigasaun risku dezastre, no servisu públiku sira seluk atu hadi’a moris komunidade.

PAM Díli hato’o apresiasaun ba kooperasaun husi Governu Japaun no Pacific Consultants, no reafirma komitmentu Autoridade Munisípiu Díli atu kontinua fó apoiu no kooperasaun ba inisiativa sira ne’ebé bele kontribui ba dezenvolvimentu no modernizasaun Munisípiu Díli, liuliu iha área planeamentu urbanu no servisu públiku.

Fontes : (𝐌𝐞𝐝𝐢𝐚 𝐆𝐚𝐛. 𝐏𝐀𝐌)