𝐃𝐢𝐥𝐢, 𝟑 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, partisipa iha almoçu ofisiál ne’ebé Primeiru Ministru Timor-Leste, Kay Rala Xanana Gusmão, oferese hodi simu Primeiru Ministru Singapura Lawrence Wong no nia delegasaun, iha Salaun Multiusos GMN Bebora Dili.

Iha oportunidade ne’e, Primeiru Ministru Singapura hato’o agradese ba Governu no povu Timor-Leste ba nia ospitalidade nebe di’ak tebes durante iha sira nia vizita ofisiál. Nia mos reafirma katak Singapura sei kontinua hametin relasaun amizade no kooperasaun ho Timor-Leste iha área oioin.

Iha sorin seluk, Primeiru Ministru Kay Rala Xanana Gusmão agradese ba Governu Singapura ba apoiu sira ne’ebé fó ba Timor-Leste, inklui suporta prosesu integrasaun Timor-Leste ba ASEAN. Nia mos dehan katak prezensa Primeiru Ministru Singapura iha Timor-Leste nu’udar vizita importante ida ne’ebé fortalese liután relasaun diplomátika entre nasaun rua.

Durante vizita ofisiál ne’e, Estadu Timor-Leste mos fó kondekorasaun Grande Colar Ordem Timor-Leste ba Primeiru Ministru Lawrence Wong, hodi rekuiñese ninia kontribuisaun boot ba dezenvolvimentu relasaun amizade no kooperasaun entre Timor-Leste no Singapura.