𝐃𝐢𝐥𝐢, 𝟏𝟕 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM) Dili, Sr. Francisco dos Santos, Hamutuk ho família boot negosiantes Merkadu Taibesi Komemora Tinan 12 Ezisténsia Merkadu Taibesi nian. serimónia ne’e organiza husi Koordenador Jestaun Merkadu Taibesi, Anibal de Deus hamutuk ho família boot negosiante sira no realiza iha Edifísiu Jestaun Merkadu Taibesi.

Objetivu husi komemorasaun aniversáriu Meradu Taibessi ne’e, atu hanoin hikas fila fali loron istória ezisténsia Merkadu Taibessi ne’ebé muda husi Merkadu Hali-Laran mai Merkadu Taibesi.

Iha selebrasaun ne’e PAM Díli hateten, “tuir planu Governu nian sei konstrui fatin foun iha merkadu Taibesi, antes hahu konstrusaun ita sei tau uluk prioridade atu hadia haris fatin no be’e mos tanba buat rua ne’e mak sai hanesan preokupasaun bo’ot ba vendedores sira, tanba ne’e husu ba ita bo’ot sira atu iha konsiensia hodi utiliza ho diak bainhira ita hadia hotu.

Tanba ne’e husu nafatin ba negosiante sira tenki servisu hamutuk ho ekipa gestaun merkadu atu nafatin tau matan ba Merkadu Taibesi liu liu konaba lixu, PAM esplika”.

Entertantu iha Ministru Komersiu no Indústria S. E. Nino Pereira hateten, Governu tenke kontinua dignifika ita nia vendedór no komersiante sira, tanba ami rekoñese katak iha vida ekonomia, setór privadu no vendedór sira desempeña papél ida ne’ebé importante tebes. Maske hasoru situasaun no dezafiu oioin, ita bo’ot sira nafatin simu responsabilidade bo’ot atu asegura fornesimentu sasán nesesidade bázika ba konsumidór sira.

Ita bo’ot sira sai ligasaun importante entre produtór no konsumidór, hodi garante katak komunidade bele asesu ba sasán nesesáriu sira. Tanba ne’e, kontribuisaun ne’ebé ita boot sira halo merese hetan apresiasaun no sai orgullu ida ba nasaun,” dehan Ministru Komérsiu no Indústria.

Governante ne’e hatete katak Governu sei kontinua dignifika no valoriza papel vendedór no komersiante sira iha Timor-Leste, tanba sira mak parte importante. Tinan kotuk Governu halo ona reabilitasaun ba Merkadu Taibesi no Merkadu Manleuana atu hadi’a kondisaun fatin fa’an no fó fasilidade di’ak liu ba komersiante no vendedór sira. Fasilidade sira ne’ebé Governu fornese iha merkadu sira ne’e, atu fasilita atividade komersial ita boot sira nian.

Projetu ne’e hakarak transforma Merkadu Taibesi no Merkadu Manleuana sai sentru komersiál modernu, ne’ebé bele hadi’a atividade komérsiu, aumenta oportunidade negósiu ba emprezáriu no vendedór sira, no fó kontribuisaun ba dezenvolvimentu ekonomia nasional.

Entertantu Merkadu Taibessi ne’e harii iha tinan 2014 no inaugurasaun husi Saudoso Fernando Lasama iha tempu ne’eba hanesan Vise-Primeriu Ministru.

Atividade selebrasaun serimónia aniversariu ne’e hahú ho Missa Agradesimentu ne’ebé prezide husi Amu selebrante, ho partisipasaun husi Ministru Komérsiu no Indústria, Prizidente Autoridade Munisipiu Dili, Komandante PNTL Esquadra Vera Cruz, reprezentante F-FDTL, Diretór no Diretór Jestaun Turizmu, no vendadór sira.