𝐀𝐢𝐥𝐞𝐮, 𝟐𝟖 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisipiu (PAM) Dili, Sr. Francisco dos Santos, partisipa iha serimónia tomada de pose ba Sr. Jacinto Ribeiro Dias nu’udar Prezidente Autoridade Munisipál (PAM) Aileu, ne’ebé lidera husi Ministru Administrasaun Estatál (MAE), S.E. Tomás do Rosário Cabral, iha Palco Sabraka Laran, Aileu Vila.

Serimónia pose ne’e realiza husi Ministériu Administrasaun Estatál no hetan partisipasaun husi membru Governu, Autoridade Munisipál sira, lideransa lokál no parseiru relevante sira.

Iha nia intervensaun, S.E. Ministru Administrasaun Estatál hateten katak pose ida ne’e hanesan parte husi esforsu IX Governu Konstitusionál atu hametin administrasaun públika no prepara implementasaun Poder Lokál. Nia enfatiza katak Prezidente Autoridade Munisipál tenke hala’o nia knaar ho integridade, responsabilidade no servisu besik komunidade, atu garante governasaun ne’ebé efetivu no promove dezenvolvimentu iha munisípiu.

Ministru MAE mós apela ba funsionáriu Servisu Munisipál Aileu, PNTL, F-FDTL, Veteranu, ONG no entidade relevante sira atu kontinua hametin kooperasaun hodi asegura pás, estabilidade no dezenvolvimentu sustentável ba Munisípiu Aileu.

Iha diskursu hafoin simu pose, Jacinto Ribeiro Dias hato’o nia agradesimentu ba IX Governu Konstitusionál, liuliu ba S.E. Primeiru-Ministru Kay Rala Xanana Gusmão, ne’ebé fó konfiansa ba nia atu assume kargu nu’udar Prezidente Autoridade Munisipál Aileu. Nia reafirma nia kompromisu atu servisu ho transparénsia no responsabilidade, no fó prioridade ba hadi’ak asesu bee mós, eletrisidade, estrada rurál no servisu públiku seluk, atu benefisia komunidade to’o iha suku no aldeia sira.

Partisipasaun PAM Dili iha serimónia ida ne’e hatudu komitmentu atu hametin koordenasaun no kooperasaun entre autoridade munisipál sira, hodi apoia implementasaun polítika Governu no hadi’a prestasaun servisu públiku ba sidadaun sira iha Timor-Leste.