𝐃í𝐥𝐢, 𝟐𝟕 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM ) Dili, Sr. Francisco dos Santos, simu ekipa konsultór nasionál husi Partnerships in Environmental Management for the Seas of East Asia (PEMSEA) iha Gabinete PAM Dili.

iha sorumutu ne’e ekipa konsultór Nasional aprezenta konseitu inisiál ba projetu pilotu jestaun lixu mariña no resiklajen iha Timor-Leste ba PAM Dili, no tuir ekipa katak Projetu ne’e hetan apoiu husi Governu Koreia no planeia atu implementa iha Munisípiu Díli, Likisá, Manatutu no Atauro.

Antes prepara konseitu projetu ne’e, ekipa konsultór halo ona konsultasaun ho munisípiu sira seluk no vizita ba Sentru Destinu Final mak Lixu iha Tibar atu avalia kondisaun jestaun lixu no identifika nesesidade sira iha área refere.

Iha aprezentasaun, ekipa konsultór esplika katak projetu ne’e propoin estabelese Material Recovery Facility (MRF) atu halo segregasaun lixu tuir nia tipu, hanesan plástiku, vidru no materiál seluk antes lori ba prosesu resiklajen no materiál sira ne’ebé bele reutiliza sei transforma filafali ba produtu foun ho valór ekonómiku.

Konseitu projetu ne’e, sei kontinua dezenvolve no halo konsultasaun nasionál iha fulan Setembru ka Outubru antes aprezenta ba Governu Koreia iha fulan Dezembru atu hetan aprovasaun. No karik aprovadu, implementasaun sei hahú iha tinan 2027–2028, no ba Munisípiu Díli planeia atu implementa iha Praia dos Coqueiros (Pantai Kelapa).

Iha PAM Dili nian intervensaun, agradese ba PEMSEA no ekipa konsultór ba inisiativa atu apoiu Timor-Leste, liuliu Munisípiu Díli, hodi dezenvolve sistema jestaun lixu ne’ebé modernu no sustentável.

Nia hatutan katak problema boot ne’ebé Munisípiu Díli hasoru agora mak lixu ne’ebé rekolla lori ba fatin destinu finál de’it tanba seidauk iha sistema resiklajen ne’ebé efetivu. Tanba ne’e, implementasaun sistema resiklajen sei sai baze importante atu apoia polítika segregasaun lixu, hamenus impaktu ambientál no aumenta valór ekonómiku husi materiál sira ne’ebé bele reutiliza.

PAM Dili mós salienta katak munisípiu presiza ekipamentu no mákina resiklajen, liuliu mákina atu harahun no kompaktor lixu, atu hasa’e kapasidade prosesamentu.

PAM apresia ba inisiativa husi PEMSEA hodi bele servisu hamutuk iha futuru no agradese mós parseiru relevante sira hodi realiza projetu ne’e, ho esperansa bele hadi’a jestaun lixu no prezerva ambientál iha Munisípiu Díli no Timor-Leste.