𝐃𝐢𝐥𝐢, 𝟐𝟗 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu (PAM) Díli Sr. Francisco dos Santos, realiza enkontru ho delegasaun husi Japan Council of Local Authorities for International Relations (J.CLAIR) Singapore, ho objetivu atu hametin kooperasaun entre governu lokal sira no promove troka esperiénsia iha área administrasaun públiku, dezenvolvimentu komunidade, no relasaun internasionál.

Parte rua troka informasaun kona-ba oportunidade sira ba kolaborasaun iha kapasitasaun rekursu umanu, governasaun lokal, dezenvolvimentu sustentável, no preparasaun Timor-Leste atu aumenta kooperasaun rejionál ho nasaun sira iha ASEAN, liuliu Timor-Leste, espesial liu ho Munisipiu Dili.

Diretor Ezekutivu J.CLAIR informa kona-ba atividade prinsipal J.CLAIR sira mak hanesan, a) Suporta aktividade governu lokal Japaun sira iha rai liur; b) Promove nivel interkambiu guvernu lokal / Kooperasaun Internasional ; no, c) Hala’o peskiza no halibur informasaun sira iha nasaun oioin.

Tanba ne’e, Diretor Ezekutivu ne’e hateten katak maske J.CLAIR nia edifisiu iha Singapore mas sira reafirma sira nia komitmentu no kompromisu atu apoiu guvernu lokal Timor-Leste, liuliu Munispiu Dili liuhosi nesesidade sira ne’ebe PAM Dili sinti katak J.CLAIR bele apoiu.

Iha parte seluk, ofisias J.CLAIR – Sr. Yasumoto mos esplika kona-ba atividade no projetu sira ne’ebe J.CLAIR halo ona iha nasaun sira hanesan Thailandia-Jestaun Lisu, Brunei-Dezenvolvimentu Komersiu, Cambodia-Jestaun Servisu Publiku nian no Malaisia-Jestaun Dalan, no Timor-Leste bele hanoin no utiliza rekursu sira husi Japaun hodi tulun Timor-Leste, liuliu Munisipiu Dili.

PAM Dili, iha nia intervensaun hatete katak kooperasaun entre Timor-Leste ho Japaun diak tebes no nia fiar katak apoiu guvernu Japaun liu husi J.CLAIR sei fo prioridade ba iha kestaun prinsipal AMD nian maka hanesan: a) Sidade Irmán (Sister City) ho Sidade ida iha Japaun – prefere Sidade Okinawa; b) Apoiu ba iha dezenvolvimentu Rekursu Umanu liuliu Sistema Dizitalizasaun; c) Apoiu area Formasaun ba kargu Sefia sira kona-ba relasaun Públika; d) Apoiu bai ha Prevensaun Dezastre Naturais; no e) Landscape Gardening ka Jestaun Jardim. PAM Dili espera katak kooperasaun sira ne’e sei bele realiza iha tempu badak hodi nune’e dezenvovimentu Munisipiu Dili bele lao ho diak.

Diretor Ezekutivu J.CLAIR reafirma katak proposta ka demanda sira AMD nian ne’ebe PAM Dili propoin sira ne’e, J.CLAIR akumula ona no iha tempu badak sira sei halo koordenasaun klean ho ekipa tekniku AMD no J.CLAIR hodi hahu ona prosesa no progresu sira molok implementasaun programa.

Enkontru ne’e hala’o iha salaun Autoridade Munisipiu Dili.

  \