𝐃í𝐥𝐢, 𝟑𝟏 𝐉𝐮𝐥𝐥𝐮 𝟐𝟎𝟐𝟔

Autoridade Munisípiu Díli (AMD), liuhusi Prezidente Autoridade Munisípiu Díli, Sr. Francisco dos Santos, entrega apoiu osan ho montante US$3,000 ba família matebian Tomas de Carvalho, liuhusi Fundu Rekompensasaun ba Funsionáriu, nu’udar forma rekoñesimentu ba nia dedikasaun no kontribuisaun durante matebian hala’o knaar iha instituisaun.

Entrega apoiu ne’e akompaña husi Diretor Rekursu Umanu, Diretora Finansas no Diretora Patrimóniu no Lojístika, no simu diretamente husi Milena Isac, nu’udar feen kaben ba matebian Tomas de Carvalho.

Iha okaziaun ne’e, Prezidente Autoridade Munisípiu Díli, hatete matebian Tomas de Carvalho, durante nia servisu iha Diresaun Servisu Munisipál Patrimóniu no Lojístika, hatudu dedikasaun aas, responsabilidade no kompromisu ba servisu públiku, ne’ebé sai ezemplu di’ak ba funsionáriu sira seluk.

Aleinde ne’e PAM lori Autoridade Munisípiu Díli nia naran hato’o sentidu kondolénsia ba família matebian no apresia mós ba servisu ne’ebé matebian kontribui ba instituisaun durante ne’e.

Fundu Rekompensasaun ba Funsionáriu ne’e hanesan mekanizmu apoiu sosiál ne’ebé Autoridade Munisípiu Díli estabelese atu fó asisténsia ba funsionáriu no sira nia família bainhira hasoru situasaun difísil, liuliu iha kazu falesimentu.