𝐃í𝐥𝐢, 𝟑𝟏 𝐉𝐮𝐥𝐥𝐮 𝟐𝟎𝟐𝟔

Prezidente Autoridade Munisípiu Díli, Sr. Francisco dos Santos, loke ofisialmente Enkontru entre Sekretariadu Forum ONG Timor-Leste (FONGTIL) no membru Organizasaun Sosiedade Sivil (OSC/ONG) sira iha rejiaun Oeste no Díli, ne’ebé realiza iha Salaun Universidade Católica Timorense (UCT), Balide, Díli.

Enkontru ne’e organiza husi Forum ONG Timor-Leste (FONGTIL) no fasilita husi Konsellu Diretiva Rede Nasional Sosial (KD-RENAS), ho apoiu PRO PALOP Timor-Leste no finansiamentu husi Uniaun Europeia (UE).

Atividade ne’e halibur Prezidenti Autoridade Munisípiu husi Díli, Reprezentante PAM Ermera, Liquiçá, Bobonaro, Atauro no RAEOA, Diretor Ezekutivu FONGTIL, Sr. Inocêncio de Jesus Xavier, Assesor Tékniku Prinsipál PRO PALOP Timor-Leste, Sr. Bruno de Lencastre, reprezentante UNDP, Diretor Asuntu Sosial no Organizasaun Komunitária, membru ONG husi munisípiu 13 no Atauro, pontu fokál FONGTIL, no parseiru dezenvolvimentu sira seluk.

Objetivu prinsipál husi enkontru ne’e mak diskute isu advokasia prioridade iha kada munisípiu, liuliu iha setór produtivu no setór estratéjiku sira seluk, atu formula rekomendasaun ne’ebé sei aprezenta ba Governu hanesan kontribuisaun ba formulasaun ajenda polítika públika, planu polítika no Orsamentu Jeral Estadu (OJE) 2027.

Liu husi programa ida ne’e, FONGTIL hakarak hametin kapasidade Organizasaun Sosiedade Sivil (OSC) sira atu halo análiza no advokasia ba OJE, hasa’e transparénsia, responsabilizasaun no partisipasaun sidadaun sira iha jestaun finanseiru públiku.

Objetivu espesífiku sira inklui identifika problema prioridade iha kada munisípiu no RAEOA, fornese informasaun ba Governu no Parlamentu Nasional ba preparasaun planu polítika no OJE 2027, apoia autoridade públika atu foti desizaun bazeia ba evidénsia, no reforsa rede advokasia ONG sira atu sai efetivu liu.

Iha diskursu abertura, Prezidente Autoridade Munisípiu Díli, Sr. Francisco dos Santos, agradese ba FONGTIL, PRO PALOP Timor-Leste no parseiru dezenvolvimentu sira tanba organiza enkontru importante ida ne’e atu hametin partisipasaun sosiedade sivíl iha prosesu planeamentu no orsamentu estadu.

“Autoridade Munisípiu Díli konsidera organizasaun sosiedade sivíl nu’udar parseiru estratéjiku ida iha dezenvolvimentu nasionál no lokál. Planeamentu ne’ebé di’ak tenke bazeia ba evidénsia, nesesidade povu no partisipasaun ema hotu, tanba orsamentu estadu tenke responde duni ba preokupasaun no nesesidade komunidade sira,” dehan Francisco dos Santos.

Nia hatete tan katak Governu Lokal sei kontinua promove governasaun di’ak, transparénsia, responsabilizasaun no diálogu konstrutivu ho sosiedade sivíl, no nakloke-an ba sujestaun no rekomendasaun sira atu hadi’a polítika públika no prestasaun servisu ba sidadaun.

“Hau hakarak enkoraja ONG sira atu kontinua halo advokasia ho responsabilidade, bazeia ba dadus no realidade iha komunidade. Liu husi kooperasaun no komunikasaun aberta, ita bele identifika problema sira no buka solusaun ne’ebé fó benefísiu ba povu,” hatete tan PAM Díli.

Antes remata nia diskursu, PAM Díli mós hato’o preokupasaun kona-ba situasaun sosiál atuál iha Timor-Leste, liuliu kona-ba problema jogu online, no bolu Organizasaun Sosiedade Sivil sira atu aumenta sira nia papél iha kontrolu sosiál no advokasia ba asuntu sira ne’ebé afeta interese nasionál.

“Sosiedade sivíl labele para de’it iha kritika iha média sosiál. Ita hotu iha responsabilidade atu salva nasaun no fó kontribuisaun ba rezolusaun problema sosiál sira ne’ebé afeta povu no estadu. Kontrola OJE importante, maibé tenke mós tau atensaun ba problema sosiál sira seluk ne’ebé dadaun ameasa futuru nasaun,” afirma Francisco dos Santos.

Durante enkontru, partisipante sira fahe ba grupu tuir munisípiu no Atauru atu diskute isu advokasia iha setór saúde, edukasaun, agrikultura, infraestrutura bázika no asuntu sosiál sira seluk. Diskusaun sira tuir mai ho aprezentasaun rezultadu, komentáriu no sujestaun husi munisípiu seluk, antes halo akumulasaun deskobrimentu no formula rekomendasaun konjunta.

Rezultadu husi enkontru rejionál ne’e sei sai dokumentu rekomendasaun prioridade ba kada munisípiu no Atauro, atu aprezenta ba Governu hanesan kontribuisaun ba preparasaun planu polítika públika no Orsamentu Jeral Estadu 2027, ho objetivu hasa’e dezenvolvimentu inkluzivu no hadi’a moris komunidade sira iha Timor-Leste.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)