𝐃í𝐥𝐢, 𝟎𝟑 𝐀𝐠𝐨𝐬𝐭𝐮 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos, hala’o enkontru koordenasaun ho Komandu PNTL Munisípiu Díli, Administrador Postu Administrativu lima (5), Xefe Suku 31, Ofisial Polísia Suku (OPS), Diretor Ezekutivu Migração, no komandante eskuadra sira, hodi diskute medida prevensaun ba krime ne’ebé dadaun aumenta iha Timor-Leste, liuliu iha kapitál Díli.

Enkontru ne’ebé realiza iha Sala Enkontru Komandu PNTL Munisípiu Díli ne’e ninia objetivu mak hametin koordenasaun entre instituisaun relevante sira hodi responde ba preokupasaun seguransa públika, inklui krime scamming call center, jogu online ilegál, estasionamentu karreta no motorizada la tuir regra iha espasu públiku, no atividade ilegál seluk ne’ebé bele ameasa dame no estabilidade iha komunidade.

Iha intervensaun PAM Díli hatete, liga ho scamming call center, jogu online ilegál ne’ebé sai preokupasaun boot, nia husu ba Administrador Postu, Xefe Suku no OPS sira atu servisu hamutuk iha suku no bairru sira hodi halo kontrolu másimu, no wanhira sente deskonfia kazu sira ne’e akontese iha suku ka bairru, bele hato’o lalais ba parte PNTL atu nune’e bele halo atuasaun imediata.

“Papel lider komunitáriu no OPS importante tebes atu halo prevensaun ba krime sira iha bairru. Bainhira iha informasaun ruma iha komunidade, tenke lalais hato’o ba PNTL atu bele halo asaun direta no mitigasaun antes problema sira sai boot,” hatete Prezidente PAM Díli.

Nia mós husu Komandu PNTL atu kontinua reforsa patrollamentu no halo operasaun konjunta iha kapitál Díli, liuliu iha bairru sira, hodi prevene krime hanesan scamming call center, jogu online ilegál no atividade kriminozu seluk ne’ebé bele perturba seguransa públika.

Iha sorin seluk, Komandante Komandu PNTL Munisípiu Díli hatete, Dili nu’udar sentru administrativu, ekonomia no governasaun nasaun nian, tanba ne’e presiza halo monitorizasaun no kontrolu ne’ebé rigorozu ba kapitál dili tanba atividade ilegál sira ne’ebé agora la’o dadaun, bele fó ameasa ba estabilidade no seguransa nasaun nian.

Komandante PNTL esplika katak PNTL sei kontinua hametin servisu intelijénsia, hodi halo kontrolu ba estranjeiru sira ne’ebé tama mai iha Timor-Leste, no halo monitorizasaun ba atividade ilegál sira, kontrolu ba jogu ilegál no halo koordenasaun ho Imigrasaun no instituisaun relevante sira atu asegura ema hotu ne’ebé hala’o atividade iha Timor-Leste hodi kumpre lei no regulamentu vigora.

Nia mós apela ba komunidade, liuliu OPS, Xefe Suku no lider lokál sira, atu kontinua serbisu hamutuk ho PNTL liuhusi partilla informasaun kona-ba situasaun sira ne’ebé akontese iha bairru sira hanesan deskonfia jogu elegal.

Iha enkontru koordenasaun ne’e, Diretor Ezekutivu Migração, Komisáriu Asistente Polísia Jorge Monteiro, fó esplikasaun ba xefe suku no OPS kona-ba prosedimentu migrasaun, hodi aumenta koñesimentu autoridade lokal sira iha monitorizasaun sidadaun estranjeiru.

Jorge Monteiro hatete katak ho Timor-Leste sai membru plenu ASEAN, movimentu sidadaun estranjeiru sei aumenta, no presiza preparasaun husi instituisaun hotu, inklui lideransa iha nivel suku no aldeia.

“Movimentu sidadaun estranjeiru sei sai boot liután, tanba ne’e kooperasaun entre Migração, PNTL no lideransa komunitária importante atu identifika atividade la klaru no prevene risku seguransa,” nia hatete.

Liu husi enkontru ne’e, parte Autoridade Munisípiu Dili, PNTL no Ministériu Relevante sira, sei servisu maka’as liu tan, hodi halo patrollamentu no monitorizasaun iha kapital Díli, no servisu hamutuk ho komunidade hodi minimiza kazu jogu illegal sira, no bele halo identifikasaun lalais no prevene atividade ilegál sira ne’ebé la’o iha kapitál dili.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)