𝐃í𝐥𝐢, 𝟎𝟒 𝐀𝐠𝐨𝐬𝐭𝐮 𝟐𝟎𝟐𝟔

Autoridade Munisípiu Díli (AMD) partisipa iha Reuniaun Prioridade Polítikas Governu (PPGs) kona-ba preparasaun Opsaun Orsamentu Jeral Estadu (OJE) 2027, liliu iha área reseitas naun-fiskál, ho objetivu atu aumenta jestaun reseitas, inklui mellora kapasidade atu rekolla reseitas hodi sustenta dezenvolvimentu no mellora prestasaun servisu públiku.

Reuniaun nee involve Autoridade Munisípiu Díli, Ministériu Transporte Komunikasaun, Ministériu Justisa no Ministériu Iinterior hodi halo diskusaun sobre estratéjia no prioridade hirak ne’ebé sei integra iha preparasaun OJE 2027. Fokus prinsipal liu mak, oinsá otimiza fontes reseitas naun-fiskál liu-husi jestaun ne’ebé efisiente, transparente no haktuir regulamentu ne’ebe vigora.

Diretor Jeral Planementu Orsamentu, Sr. José Alexandre de Carvalho, hateten mós aprezenta materia komite revizaun polítika (KRP) nian ne’ebé tau focus ba Prioridade Polítika Governu ba entidade sira atu prepara dokumentu sobre opsaun hirak ne’ebé refleta PPG3 ne’ebé hakerek ona iha vizaun jeral haat hanesan kriasaun espasu fiskal, presoens polítika governu sentral nian, oportunidade opsoens polítika setorais no ideia foun mai husi ministeriu sira.

Iha oportunidade nee, Prezidente Autoridade Munisípiu (PAM) Díli, Sr. Francisco dos Santos, aprezenta sobre kolleksaun taxa husi utilizasaun públiku, no dezafiu hirak iha rekolla reseitas naun-fiskál, inklui reseitas husi merkadu, estasionamentu, taxa servisu públiku, okupa espasu públiku no fontes reseitas seluk.

Iha enkontru nee, reprezentante institutusaun 4 refere mós troka hanoin kona-ba medida inovativu atu hasa’e reseitas, inklui atu garante katak, rekolla taxa no reseita hirak hotu sei hala’o ho responsabilidade, transparénsia no akuntabilidade.

Autoridade Munisípiu Díli reafirma nia kompromisu atu kontinua hametin koordenasaun ho Governu Sentral no entidade relevante hirak atu mellora sistema jestaun reseitas naun-fiskál, hasa’e rekolla reseitas tuir lei no regulamentu, no promove boa governasaun atu fó benefísiu ba komunidade no dezenvolvimentu sustentável iha Munisípiu Díli.

Enkontru ida nee, Diretora Jeral Tezouru mak organiza liga fali ba preparasaun OJE 2027 nian, “ita komesa implementa ona lei enkuadramentu OJE no jestaun finanseira 2025, ita fahe orsamentu ba buat rua, oramentu ne’ebé ba polítika ezistenti ho kustu operasional instituisaun nian tama ona ba estimativas futuras, ne’ebé mak fahe ona iha fulan kotuk liuba”.

Espera katak, diskusaun hirak durante reuniaun nee bele kontribui ba formulasaun polítika no alokasaun orsamentu Governu ba tinan 2027. Nune’e, reseitas naun-fiskál bele sai hanesan fonte importante hodi apoiu implementasaun programa no projetu dezenvolvimentu iha nível nasional no munisipál iha Timor-Leste.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)