𝟎𝟓 𝐀𝐠𝐮𝐬𝐭𝐮 𝟐𝟎𝟐𝟔

Governu liu husi 𝐏𝐫𝐞𝐳𝐢𝐝𝐞𝐧𝐭𝐞 𝐀𝐮𝐭𝐨𝐫𝐢𝐝𝐚𝐝𝐞 𝐌𝐮𝐧𝐢𝐬í𝐩𝐢𝐮 (𝐏𝐀𝐌) 𝐃𝐢𝐥𝐢, 𝐒𝐫. 𝐅𝐫𝐚𝐧𝐜𝐢𝐬𝐜𝐨 𝐝𝐨𝐬 𝐒𝐚𝐧𝐭𝐨𝐬, hamutuk ho instituisaun interministeriál relevante sira, hala’o diálogu ho família okupante hamutuk uma kain 24 iha Fomentu I, Suku Comoro, atu buka solusaun antes implementa planu Governu nian ba konstrusaun edifísiu foun EDTL, E.P. iha Caicoli.

Diálogu ne’e realiza tanba tuir planu Governu, funsionáriu EDTL, E.P. sira ne’ebé atualmente servisu iha Caicoli sei muda temporariamente ba Fomentu I durante períodu konstrusaun edifísiu foun EDTL, E.P. Nune’e, Governu presiza prepara área refere atu bele suporta transferénsia servisu ne’e no garante implementasaun projetu estratéjiku tuir planu.

Iha diálogu ne’e, parte interministeriál sira rona diretamente preokupasaun no aspirasaun husi família okupante sira, ho objetivu atu buka solusaun ne’ebé justu no dignu, inklui avaliasaun ba mekanizmu indemnizasaun tuir lei no regulamentu antes hala’o prosesu eviksaun. Governu mós reafirma katak prosesu tomak sei la’o tuir prosedimentu legál no administrativu atu asegura direitu no satisfasaun ba parte hotu.

Iha nia intervensaun, Prezidente Autoridade Munisipiu (PAM) Dili, Sr. Francisco dos Santos, hatete katak hanesan reprezentante Governu Sentral iha Munisípiu Dili, AMD iha responsabilidade atu fasilita diálogu no buka solusaun ne’ebé di’ak ba komunidade no instituisaun sira, liuliu ba implementasaun projetu estratéjiku Governu nian.

Nia subliña katak prosesu hotu tenke la’o tuir dalan legál no administrativu ne’ebé loos, hodi garante satisfasaun ba parte hotu. Nia mós informa katak antes ne’e AMD halo ona notifikasaun ba família okupante sira, no diálogu ohin loron nian objetivu mak atu rona diretamente preokupasaun, ezijénsia husi komunidade antes Governu foti desizaun finál.

“Desizaun ida ne’e tenke bazeia ba prosesu legál no koordenasaun entre instituisaun relevante sira. Ohin ita halibur atu prepara akta enkontru ida ne’ebé sei submete ba autoridade kompetente atu konsidera no foti desizaun finál. Bainhira orientasaun finál sai, ekipa konjunta Governu sei ezekuta tuir desizaun ne’ebé estabelese,” dehan PAM.

Iha fatin hanesan, Komisáriu Ezekutivu Serbisu Korporativu EDTL, E.P., Sr. Júlio de Jesus Gonçalves, hatete katak diálogu ne’e realiza atu fó informasaun ba komunidade kona-ba planu Governu atu utiliza rai Estadu nian iha Fomentu I no Caicoli hodi suporta implementasaun projetu konstrusaun edifísiu foun EDTL, E.P. Nia hatutan tan katak área refere atualmente okupa husi família uma-kain hamutuk 24, no antes ne’e Autoridade Munisipiu Dili halo ona notifikasaun ofisiál ba okupante sira iha loron 5 fulan Marsu tinan 2026 liu ba, kona-ba estatutu legál rai refere.

Komisáriu Ezekutivu EDTL, E.P. esplika katak Governu iha ona planu atu hahú konstrusaun iha tempu badak. Tanba ne’e, AMD hamutuk ho instituisaun relevante sira kontinua halo koordenasaun no diálogu ho komunidade atu buka mekanizmu ne’ebé apropriadu no dignu ba prosesu administrativu ka indemnizasaun

Enkontru ne’e marka prezensa husi Komisáriu Ezekutivu Serbisu Korporativu EDTL, E.P., Diretor Nasionál Hijene Ordem Públiku husi SEATOU, Diretor Terras no Propriedades Munisípiu Díli, Komandante Eskuadra Dom Aleixu, Autoridade Lokál sira no komunidade okupante sira.

Diálogu ne’e reforsa kompromisu Governu atu kontinua hametin koordenasaun ho instituisaun relevante no komunidade hodi buka solusaun ne’ebé tuir lei, justu no dignu, antes implementa projetu estratéjiku Governu nian.

Fontes : (𝗠é𝗱𝗶𝗮 𝗚𝗮𝗯. 𝗣𝗔𝗠)