𝐃í𝐥𝐢, 𝟎𝟔 𝐀𝐠𝐨𝐬𝐭𝐮 𝟐𝟎𝟐𝟔.

Prezidente Autoridade Munisípiu Díli (PAM Dili), Sr. Francisco dos Santos, hala’o vizita traballu ba Postu Administrativu Nain Feto ho objetivu atu monitoriza diretamente implementasaun programa governu, haree kondisaun servisu administrativu no hametin koordenasaun entre administrasaun munisipál ho autoridade lokál.

Iha vizita ne’e, PAM Dili ho nia ekipa simu husi Administrador Postu Administrativu Nain Feto no halo enkontru ho xefe suku no xefe aldeia sira hodi rona relatóriu kona-ba progresu servisu, dezafiu sira ne’ebé enfrenta iha terrenu no prioridade sira atu mellora atendimentu públiku ba komunidade.

Durante vizita ne’e, PAM Dili enfatiza katak servisu públiku tenke realiza ho responsabilidade, transparénsia no hametin servisu hamutuk entre administrasaun postu, autoridade lokal no komunidade, atu asegura programa governu sira bele implementa ho diak no responde ba nesesidade povu nian.

“Vijita ohin hanesan vijita dahat iha Munisípiu Díli, ho objetivu atu hare besik ita bo’ot sira nia progresu servisu no dezafiu sira ne’ebe mak ita bot sira infrenta atu nune’e bele kanaliza ka transfere ita bo’ot sira nia hanoin oinsa atu buka solusaun, maibe iha parte ida ne’e hau hakarak fo hanoin ba ita bo’ot sira,liu liu ba sefe suku sira atu tau atensaun liu ba programa dezenvolvimentu komunitaria, ne’ebe ho objetivu oinsa mak ita bo’ot sira atu identifika prioridade sira iha ita bo’ot sira nia aldeia ka suku ba 2026-2030, tamba husi PDK mak ita foin dezenvolve sai ba planu PDIM nian” dehan PAM

Iha Biban ne’e PAM mos apela ba Nai Suku no Sefe Aldeia sira Atu mantein koperasaun servisu ho Polisia suku sira, atu nafatin halo operasaun konjuta tamba operasaun konjuta la presija Ekipa bo’ot maibe ita bot’ot sira bele envolve an iha laran hamutuk ho Polisia suku no jovem sira hodi kria paz no estabilidade iha suku laran.

“Nafatin husu ba nai Suku sira Atu uza mekanizmu oin oin hodi garante ita nia

ambiente iha Bairu laran, hodi fo atensaun ba ita nia Maluk sira atu nunee evita problema ka kazu sira nebe agora dadaun sai preokupasaun ba ema hotu hanesan jogu online ilegal.”

Vizita traballu ida ne’e sai hanesan parte ida husi esforsu PAM Dili atu kontinua monitoriza implementasaun programa dezenvolvimentu iha postu administrativu hotu-hotu, hodi garante servisu públiku ne’ebé efetivu, efisiente no bele responde ba nesesidade komunidade iha Munisípiu Díli.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)