𝐏𝐀𝐌 𝐃𝐈𝐋𝐈 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐊𝐑𝐏 𝐇𝐎𝐃𝐈 𝐃𝐈𝐒𝐊𝐔𝐓𝐄 𝐏𝐑𝐎𝐆𝐑𝐀𝐌𝐀 𝐏𝐑𝐈𝐎𝐑𝐈𝐃𝐀𝐃𝐄 𝐆𝐎𝐕𝐄𝐑𝐍𝐔 (𝐏𝐏𝐆)

𝐃𝐢𝐥𝐢, 𝟐𝟏 𝐀𝐠𝐨𝐬𝐭𝐮 𝟐𝟎𝟐𝟔

Prezidente Autoridade Munisipiu Dili (PAM Dili), Sr. Francisco dos Santos, partisipa iha reuniaun ho Komité Revizaun Polítika (KRP) hodi diskute Programa Prioridade Governu (PPG), liuliu PPG 3, ne’ebé foka ba Programa Nasionál Investimentu Sistema Reseita Doméstika, ho objetivu atu prioritiza nesesidade no rasionaliza despeza Estadu.

Diskusaun PPG 3 ne’e envolve Autoridade Munisipiu Dili, Ministériu Transporte no Komunikasaun liuhusi DNTT, Ministériu Justisa liuhusi DGSRN no UABIE, no Ministériu Interiór liuhusi Servisu Migrasaun.

Komité Revizaun Polítika (KRP) lidera husi S.E. Primeiru-Ministru, Sr. Kay Rala Xanana Gusmão, ho partisipasaun husi membru sira, inklui S.E. Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Sr. Francisco Kalbuady Lay; Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Sr. Mariano Assanami Sabino; Ministra Finansas, Sra. Santina José Rodrigues F. Viegas Cardoso; no Ministru Obras Públikas, Sr. Samuel Marçal, Vise-Ministra Finansas Regina de Jesus de Sousa.

Observadór sira mos partisipa husi Komisaun Funsaun Públika.

Reuniaun ne’e remata ho aprovasaun ba programa-núkleu no envelope indikativu ba Faze 1, ne’ebé sei sujeitu ba prosesu hirak tuirmai, inklui:

• Validasaun ba kustu no entidade sira ne’ebé sei partisipa iha Faze 1;

• Rekonsiliasaun meta aduaneira ho senáriu VAT no ASEAN; no

• Monitorizasaun ba trajetória meta reseita doméstika anuál.

Reuniaun ne’e hala’o iha Sala Auditorium Kay Rala Xanana Gusmão, Ministériu Finansas, Aitarak-Laran, no konta ho partisipasaun husi liña ministeriál no entidade relevante sira.

Reuniaun Programa Prioridade Governu (PPG) ne’e hala’o husi loron 17 to’o 27 Agostu 2026.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌 𝐃𝐢𝐥𝐢)