𝐏𝐀𝐌 𝐃Í𝐋𝐈 𝐋𝐈𝐃𝐄𝐑𝐀 𝐄𝐍𝐊𝐎𝐍𝐓𝐑𝐔 𝐂𝐂𝐌 𝐇𝐎𝐃𝐈 𝐀𝐕𝐀𝐋𝐈𝐀 𝐏𝐑𝐎𝐆𝐑𝐄𝐒𝐔 𝐒𝐄𝐑𝐕𝐈𝐒𝐔 𝐀𝐌𝐃 𝐍𝐈𝐀𝐍 𝐍𝐎 𝐏𝐑𝐈𝐎𝐑𝐈𝐃𝐀𝐃𝐄 𝐃𝐄𝐙𝐄𝐍𝐕𝐎𝐋𝐕𝐈𝐌𝐄𝐍𝐓𝐔

𝐃𝐢𝐥𝐢, 𝟐𝟔 𝐀𝐠𝐮𝐬𝐭𝐮 𝟐𝟎𝟐𝟔

Prezidente Autoridade Munisipiu (AMD) Dili, Sr. Francisco dos Santos, lidera enkontru konsellu Coordenasaun Munisipál (CCM) hodi diskute no avalia progresu servisu, planu no atividade prioridade sira ne’ebé AMD sei hala’o, inklui jestaun estasionamentu iha Dili, projetu infraestrutura, preparasaun ba Aniversáriu Dili Day no Komemorasaun Proklamasaun Independénsia 28 Novembru.

Enkontru ne’e hala’o iha Salaun A, AMD.

Enkontru CCM ne’e hanesan enkontru regulár ne’ebé AMD hala’o kada fulan, ho partisipasaun husi Diretór Servisu Munisipál sira, Administradór Postu Administrativu lima, Asesór Legál na’in rua, Asesór Apoiu Tékniku AMD no Xefe Gabinete AMD.

Enkontru ne’e sai nu’udar forum ida atu kada unidade aprezenta progresu servisu no halo avaliasaun kona-ba atividade sira ne’ebé hala’o iha área respetiva.

Iha enkontru ne’e, Prezidente AMD hamutuk ho membru CCM ko’alia kona-ba dezenvolvimentu no jestaun estasionamentu iha Dili, inklui iha área turístiku sira hanesan Kristu Rei, João Paulo II no BJ Habibie, ho objetivu atu hadi’a organizasaun no jestaun estasionamentu iha área sira ne’e.

Tuir planu AMD, sei instala mákina pagamentu estasionamentu automátika iha área Kristu Rei, liuliu iha pontu entrada hosi Área Branca ba Kristu Rei no iha área kotuk ka Dolok Oan. Medida ne’e atu hadi’a sistema jestaun estasionamentu no organiza utilizasaun espasu estasionamentu iha área turístiku ne’e.

Aleinde ne’e, PAM mós orienta Diretór Servisu Munisipál sira atu halo monitorizasaun no observasaun direta ba projetu sira ne’ebé dadaun hala’o hela, hodi asegura katak progresu servisu la’o tuir planu no padraun ne’ebé determina ona.

Karik iha projetu ruma ne’ebé implementasaun la la’o tuir planu ka kompañia kontratada la kumpre ho responsabilidade, AMD sei foti medida apropriada no rigorozu tuir regra no kontratu ne’ebé vigora.

Iha parte ikus, Prezidente AMD husu ba Diretór Servisu Munisipál sira atu prepara ho di’ak ba selebrasaun Aniversáriu Dili ka Dili Day, ne’ebé sei hala’o iha loron 10 fulan Outubru, no loron Komemorasaun Proklamasaun Independénsia iha 28 Novembru.

Fontes : (𝐌é𝐝𝐢𝐚 𝐆𝐚𝐛. 𝐏𝐀𝐌)