PAM DÍLI HO DIRETÓR SMASA KONVOKA ENKONTRU URJENTE HO FUNSIONÁRIU SIRA HUSI SMASA

𝐃í𝐥𝐢,𝟏𝟎 𝐃𝐞𝐳𝐞𝐦𝐛𝐫𝐮 𝟐𝟎𝟐𝟓

Kuarta feira ne’e, Prezidente Autoridade Munisípiu (PAM) Díli, Sr. Francisco dos Santos ho Diretór SMASA ( Servisu Munisipál Água no Saneamentu), Sr. Domingos Gudinho konvoka enkontru urjente ho funsionáriu sira husi SMASA, hodi ko’alia kona-ba jestaun lixu no asegura hamos lixu iha kapitál Díli durante períodu selebrasaun loron boot Natal no Tinan Foun.

Objetivu husi enkontru ida ne’e oinsa atu asegura nafatin sidade Díli permanese moos, saudável, no konfortável ba públiku durante loron boot natal no tinan foun, tamba dala barak wanhira iha tempu selebrasaun loron boot Díli sempre hasoru volume lixu ne’ebé sa’e maka’as.

Iha enkontru ne’e, PAM Díli husu ba Ekipa SMASA atu prepara planu ne’ebé koordenadu no efisiente hodi bele responde ba kestaun lixu iha sidade Díli, ne’ebé aumenta iha selebrasaun tinan-tinan, no iha tinan ne’e PAM Díli garante sei la hanesan tinan hirak ne’ebé liu ona.

Alende ne’e, PAM mós apelu ba komunidade Díli tomak atu kolabora, hodi Soe lixu iha fatin ne’ebé loos no Labele soe lixu arbiru iha estrada ka bee-dalan.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)