𝐅𝐎𝐑𝐓𝐈𝐅𝐈𝐊𝐀𝐒𝐀𝐔𝐍 𝐅𝐎𝐎𝐒 𝐈𝐌𝐏𝐎𝐑𝐓𝐀𝐍𝐓𝐄 𝐁𝐀 𝐏𝐑𝐎𝐆𝐑𝐀𝐌𝐀 𝐌𝐄𝐑𝐄𝐍𝐃𝐀 𝐄𝐒𝐊𝐎𝐋𝐀𝐑

𝐃í𝐥𝐢, 𝟐𝟐 𝐀𝐛𝐫𝐢𝐥 𝟐𝟎𝟐𝟔

Prezidente Autoridade Munisípiu (PAM) Díli, Sr. Francisco dos Santos hamutuk ho World Food Programme (WFP) no Centro Logística Nasional (CLN) realiza enkontru ida hodi diskuti kona-ba fortifikasaun foos atu apoia programa merenda eskolar iha Timor-Leste.

Enkontru ne’e hanesan enkontru kontinuasaun husi programa WFP nian ne’ebe hakarak fo apoiu máximu ba labarik kik sira liu husi fortifikasaun fos ba Programa Merenda Eskolar nian, ho objetivu prinsipal mak atu buka dalan hadia kualidade nutrisaun iha eskola, liu-liu hodi integra foos ne’ebé fortifika ho vitamina no mineral esensial sira iha merenda eskolar.

Representante husi WFP Ali Ahmad Khan hateten programa fortifikasaun fos ne’e hanesan atu apoiu Governu Timor-Leste liu-liu iha Munisípiu ha’at, no programa ne’e rasik hanesan parte importante ida hodi apoiu ba Merenda Eskolar atu Hadi’a labarik sira nia saúde no mos bele Imellora ba sira nia apredijazen.

“Fortifikasaun fos ne’e hanesan programa husi WFP no halo koordenasaun ho setor privadu hodi halo instalasaun ba Mákina fortifikasaun fos iha Munisípiu tolu hanesan, Bobonaru, Maliana ho Baucau maibe iha Munisípiu Díli ita halo koordenasaun ho CLN, no projetu ne’e rasik ho durasaun durante tinan lima hahú husi 2026 to 2029, no ha’u espera liu husi koordenasaun ida ne’e bele lori benefísiu mai ita hotu. Aleinde fortifikasaun fos WFP tenta atu koordena ho ita nia agrikultór sira hodi fo apoiu ba Programa Merenda Eskolar no sei hari’i mos dapur iha Díli inklui

mos fornese utensilus bazeia ba avaliasaun ne’ebé ami halo ona iha fulan setembru tinan kotuk, iha parte seluk mos UNICEF mos sei apoiu kona-ba be’e no saneamentu no ILO rasik mos sei toma konta iha protesaun sosiál nian.”

Aleinde ne’e PAM Díli hateten, programa ne’e di’ak tebes, maske Merenda Eskolar ne’e ita implementa ona iha tinan hirak liu ba maibe mosu fali ho programa fortifikasaun fos bele rejolve problema liu-liu nutrisaun ba labarik sira iha eskola.

“Hanesan Autoridade Munisípiu Díli agradese tebes ba programa ne’e no ha’u espera CLN sei garantia kualidade no sustentabilidade neʼebé diak, ita ko’alia kona-ba sustentabilidade maka CLN tenki garantia Stok fos hodi sustenta hahán ba ita nia oan sira, tamba ita hotu hatene katak dadaun ne’e númeru eskola aas tebes hamutuk 70.000 benefisiáriu ba merenda eskolar, ho nune’e ita hatene kalkulasaun fos ne’e loron ida hira, atu nune’e ita nia polítika fortifikasaun fos liu husi CLN bele garantidu iha future liu-liu ba ita nia fos lokal no importasaun, no hau garantia prograrama ne’ebe ita hahu tenki to duni nia finalidade iha baze ho nune’e ita nia komunidade Isir abele hatene katak programa Governu no WFP ne’e realiza duni.”

Iha fatin hanesan Prezidente CLN António de Araujo Soares hateten, “husi parte CLN nian mak atu hare liu ba fortifikasaun fos no oinsa mak atu fo produtu ne’ebe mak ami iha liu-liu ba parte rua mak hanesan fos importasaun no fos lokal, depois de iha diskusaun tekniku ne’e ami husi CLN pronto fasilita iha fornesimentu fos tamba ita iha kondisaun diak atu halo prosesamentu ba fortifikasaun fos ne’e rasik, no ami hare katak dadus ne’ebe ita iha la iha problema no ba oin ami sei hare liu ba kontagen produtu ne’ebe maka atu fo hodi garante nia kualidade no dadauk ne’e ami iha tonelada ida resin hodi fornese iha fulan Setembru nia laran.

Durante enkontru, parte sira mos diskuti kona-ba nesesidade atu reforsa koordenasaun entre setór importante hanesan edukasaun, saúde, agrikultura no seguransa alimentár, no mos atu estabelese sistema monitorizasaun atu avalia impaktu programa merenda eskolar iha kada trimestre.

Atualmente, programa fortifikasaun foos implementa ona iha munisipiu haat, mak hanesan LAileu, Covalima, Díli no Lautém. Tuir planu, WFP sei konstrui dapur eskolar hamutuk 24 iha períodu 2026 to’o 2030 hodi apoia implementasaun programa ne’e.

Inisiativa ida ne’e espera bele fó kontribuisaun boot ba hadi’a saúde no nutrisaun labarik sira, nune’e mos suporta dezenvolvimentu rekursu umanu iha Timor-Leste ba futuru.

Fontes : (Media Gab.PAM)