𝐏𝐑𝐄𝐙𝐈𝐃𝐄𝐍𝐓𝐄 𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒Í𝐏𝐈𝐔 𝐃Í𝐋𝐈 𝐇𝐎 𝐃𝐈𝐑𝐄𝐓𝐎𝐑 𝐉𝐄𝐑𝐀𝐋 𝐌𝐈𝐍𝐈𝐒𝐓É𝐑𝐈𝐔 𝐊𝐎𝐌É𝐑𝐒𝐈𝐔 𝐍𝐎 𝐈𝐍𝐃𝐔𝐒𝐓𝐑𝐈𝐀 𝐃𝐈𝐒𝐊𝐔𝐓𝐄 𝐊𝐎𝐍𝐀-𝐁𝐀 𝐌𝐔𝐃𝐀𝐍𝐒𝐀 𝐓𝐀𝐈𝐒 𝐌𝐀𝐑𝐊𝐄𝐓 𝐍𝐎 𝐅𝐀𝐓𝐈𝐍 𝐏𝐑𝐎𝐏𝐑𝐈𝐔 𝐁𝐀 𝐊𝐔𝐋𝐈𝐍𝐀𝐑𝐈𝐀

𝐃í𝐥𝐢 𝟐𝟏 𝐌𝐚𝐢𝐮 𝟐𝟎𝟐𝟔

PAM Díli, Sr. Francisco dos Santos hasoru malu ho Diretór Jeral MCI, Sr. Jorge Ferreira ho nia ekipa hodi koália kona-ba mudansa Tais Market ba fatin seluk nomos fatin propriu Kulinaria iha Kapital Dili. Enkontru ne’e, hala’o iha Gabinete PAM Dili.

Iha enkontru ne’e, Diretór Geral Indústria hateten katak, dadaun ne’e Ministériu iha planu atu muda Merkadu Tais /Tais Market ba fatin seluk tanba fatin refere hetan alargamentu. Ho nune’e DG ne’e husu PAM Díli atu fasilita hela fatin ne’ebe mamuk hodi bele muda Negosiante sira ba fatin propriu. MCI propoin atu konstrui Merkadu Tais foun iha KBRI nia sorin/liman loos besik Jardin Maloa. No, DG MCI ne’e mos husu apoiu husi PAM Dili atu identifika fatin ka rai estadu balun hodi konstrui Kulinariu Propriu, hanesan iha parte-leste Becora, parte sentral KBRI nia sorin no parte oeste maka iha Comoro.

PAM Díli iha nia intervensaun hateten nudar Autoridade Munisipiu Dili reafirma katak kontinua serbisu hamutuk ho Ministériu no entidade relevante sira hodi kontribui ba dezenvolvimentu Dili ne’ebe furak no diak. Nia hatutan, katak ba Dili nia diak, AMD sei apoiu no espera katak MCI molok muda negosiate sira iha Merkadu Tais ne’eba tenki ser prepara fatin uluk hodi nune’e labele kria fali problema ba sira. PAM apoiu MCI atu hari’I futuru Merkadu Tais iha Jardim Maloa nia sorin inklui fatin Kulinaria Propriu ba parte sentral nian.

PAM Díli mos husu nafatin ba MCI atu tau atensaun lalais ba iha Merkadu Manleuana no Taibesi tanba dadauk ne’e Públiku kestiona makas ba Sánitariu iha fatin refere.

Parte PAM Dili no MCI konkorda hodi halo koordenasaun diak hodi halo dezenvolvimentu ba iha Kapital Dili nian.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)