𝐀𝐔𝐓𝐎𝐑𝐈𝐃𝐀𝐃𝐄 𝐌𝐔𝐍𝐈𝐒𝐈𝐏𝐈𝐔 𝐃𝐈𝐋𝐈 𝐒𝐄𝐑𝐕𝐈𝐒𝐔 𝐇𝐀𝐌𝐔𝐓𝐔𝐊 𝐌𝐈𝐍𝐈𝐒𝐓𝐄𝐑𝐈𝐔 𝐅𝐈𝐍𝐀𝐍𝐒𝐀𝐒 𝐍𝐎 𝐋𝐈Ñ𝐀 𝐌𝐈𝐍𝐈𝐒𝐓𝐄𝐑𝐈𝐀𝐋 𝐒𝐈𝐑𝐀 𝐑𝐄𝐀𝐋𝐈𝐙𝐀 𝐊𝐎𝐍𝐒𝐔𝐋𝐓𝐀𝐒𝐀𝐔𝐍 𝐒𝐈𝐃𝐀𝐃𝐀𝐍𝐈𝐀

𝐃𝐢𝐥𝐢 𝟐𝟐 𝐌𝐚𝐢𝐮 𝟐𝟎𝟐𝟔

Autoridade Munisípiu Dili hamutuk ho Ministeriu Finansas inklui liña Ministerial sira hanesan Edukasaun, Saude, Obras Publiku, Bee Timor-Leste, Eletrisidade, hala’o atividade konsultasaun Sidadania ba iha Munisipiu Dili. Ho objetivu atu promove governasaun inkluziva no asegura katak lian sidadaun sira kontribui diretamente ba definisaun prioridade nasionál sira. Konsultasaun ne’e realiza iha Ministeriu Finansas Aitarak Laran, Dili.

Partisipa iha Konsultasaunb Sidadania ne’e, maka Konsellu Konsultivu Munisipal Dili nian inklui Administrador Postu sira, no Xefe Suku 31, representante partidu politiku sira ne’ebe hetan asentu iha Parlementu Nasional, representante ONG nasional, veteranu, setor privadu, juventude, konfisaun Relijioza, no representante organizasaun igualdade jeneru nian.

Prezidente Autoridade Munisípiu Dili, Sr. Francisco dos Santos iha nia diskursu dahuluk hateten katak konsultasaun ida ne’e hodi hametin koordenasaun entre Governu Sentral, AMD no komunidade liuliu iha Munisipiu Dili. AMD iha komitmentu atu garante prosesu ne’e transparente no partisipativu. Iha tinan 2026, Autoridade Munisipal Dili sei fó prioridade ba a) hametin prestasaun servisu públiku, b) hadi’a jestaun saneamentu no ambiente, c) manutensaun estrada no drenajen, d) apoiu ba edukasaun no saúde komunidade, no e) hametin ekonomia lokal no juventude empreendedór sira.

Molok abertura konsultasaun sidadania Munisipiu Dili nian, Vise Ministra Finansas, Sra. Regina de Jesus de Sousa iha nia diskursu hateten, partisipasaun Autoridade lokal no Lideransa sira importante tebes tanba sira maka besik liu ho povu no komprende diretamente nesesidade no dezafiu ne’ebe povu ka komunidade sira infrenta. Tanba ne’e liu husi konsultasaun ida ne’e Governu fiar katak dezenvolvimentu nasional sei lao ho diak bainhira planeamentu no orsamentu bazeia ba realidade iha terrenu no envolve partisipasaun ativu husi Autoridade lokal no lideransa sira. Ida-ne’e demonstra esforsu nasionál ida ne’ebé importante atu envolve sidadaun sira iha territóriu tomak no parseiru sosial sira iha prosesu planeamentu no orsamentasaun nasional.

Liuhosi prosesu ida-ne’e, Governu halibur hanoin, aspirasaun no perspetiva sidadaun sira kona-ba dezafiu dezenvolvimentu, lakunas iha prestasaun servisu públiku, no intervensaun prioritária sira ne’ebé presiza responde iha OJE 2027. Objetivu prinsipál maka asegura katak politika públika no desizaun orsamentál sira bazeia ba nesesidade real no esperiénsia komunidade sira nian.

Iha sesaun apresentasaun lina ministerial sira, Diretor Jeral sira hato’o ida-idak nia planu dezenvolvimentu mak hanesan: a) Setor Turismu no Ambiente, ne’ebe koalia liu ba nesesidade konservasaun no protesaun ambiente nian nudar knaar estadu sira nian; b) Setor Saude, koalia kona-ba programa dezenvolvimentu rekursu umanu iha área Saúde. c) Area Eletrisidade, nia objetivu prinsipál mak hasa’e koñesimentu sidadaun no garante utilizasaun eletrisidade ne’ebé seguru, justu no sustentável. d) Setor Agrikultura, Pekuaria, Peska no Floresta ne’ebe koalia liu oinsa mak hasa’e produksaun agrikultura, segurança alimentar no renda komunidade nian. e) Be’e Timor Leste, koalia liu ba projetu sistema bee moos no saneamentu iha área BTL. f) Setor Edukasaun apresenta kona-ba identifikasaun dezafiu sira hanesan asesu ba eskola, kualidade aprendizajen, infraestrutura no edukasaun inkluziva. No g) Setor Obras Publika koalia kona-ba oinsa garante projetu sira lao tuir interese públiku.

Iha sesaun diskusaun, lider komunitariu sira hato’o sira preokupa kona-ba dezenvolvimentu ne’ebe maka sidauk to’o ka adekuadu ba iha sira nia kumunidade. Prekupasaun sira ne’e espera katak bele bele hetan atensaun no prioridade atu bele garantia dezenvolvimentu ida ne’ebe refleta nesesidade povu iha Munisipiu Dili.

PAM Díli Iha enseramentu hateten katak preukupasaun husi Xefe Suku sira nian importante tebes tanba ne’e PAM Dili sujere no rekomenda ba iha Ministériu Finansas atu la bele koa ka redus proposta sira ne’ebe submete husi AMD atu nune’e bele responde duni ba preukupasaun komunidade no dezenvolvimentu Munisipiu Dili nian.

Fontes : (𝐌é𝐝𝐢𝐚 𝐆𝐚𝐛.𝐏𝐀𝐌)